«Երկրորդ կյանք»՝ Ցեղասպանության զոհերի հիշատակին զետեղված ծաղիկներին. «ՀԵՆՔ»-ը մասնակցեց «Արալեզ»-ի նախաձեռնած ծաղկահավաքին (տեսանյութ, լուսանկարներ)

Արդեն 15 տարի, «Արալեզ» ԲՀԿ-ի նախաձեռնությամբ, ապրիլի 24-ից հետո, Ծիծեռնակաբերդի հուշահամալիրում կազմակերպվում է ծաղկահավաք: 

Նախաձեռնության հեղինակների նպատակը պոկված ծաղիկներին «երկրորդ կյանք» տալն է: 

Ծաղկահավաքն իր մեջ խորհուրդ ունի. բնապահպանական միջոցառում լինելուց զատ, այն նաև Ցեղասպանության անմեղ զոհերի հիշատակը հավերժացնելու յուրօրինակ հարգանքի արտահայտման ձև է:  Հիշատակին զետեղված ծաղիկներն այս կերպ նոր կյանք ու նոր շունչ են ստանում:

Անմար կրակի մոտ կուտակված ծաղիկները  խնամքով հավաքվում են, այնուհետև առանձնացվում են դրանց թերթիկները, որոնք չորացվում են և օգտագործվում թղթի արտադրության ու մոմերի պատրաստման մեջ։

Կազմակերպության ղեկավար Սարօ Թաթյոսը NEWSPRESS.am-ի հետ զրույցում նշեց, որ ծաղկաթերթերից ստացված թղթերի վրա նամակներ են գրում տարբեր երկրների ղեկավարների: Նրանց, ովքեր ճանաչել են Ցեղասպանությունը՝ շնորհակալություն են հայտնում, իսկ նրանց, ովքեր տարբեր  պատճառներով անտարբեր են Օսմանյան Թուրքիայի կողմից հայերի նկատմամբ իրականացված Եղեռնին՝ այդ թղթերի վրա մանրամասն նկարագրվում է, թե ինչ է իրականում տեղի ունեցել:

Հատկանշական է, որ այս տարի մասնակիցները ծաղիկների թերթիկները ոչ թե պարզապես փռել էին չորացնելու համար, այլ այդ թերթիկներից պատրաստել էին գորգ՝ անմոռուկի տեսքով, որի կենտրոնում նշված էր Ցեղասպանության տարելիցի թիվը՝  110։

Ծաղկահավաքի արդյունավետ կազմակերպման համար, ամեն տարի Արալեզին են միանում բազմաթիվ դպրոցականներ ու ուսանողներ:

ՀԵՆՔ համագային բարեգործական հիմնադրամն այս տարի ևս անմասն չմնաց ծաղկահավաքին մասնակցելու աշխատանքներից: 

ՀԵՆՔ-ի ուսանողներն ու դասախոսները՝ տնօրեն Լիլիթ Սահակյանի անմիջական նախաձեռնությամբ ու մասնակցությամբ, միջոցառման մաս կազմեցին:

Մինչ ծաղկահավաքի աշխատանքներին միանալը, վերջիններս յուրովի մոտեցմամբ մատուցեցին իրենց հարգանքի տուրքը Եղեռնի ամեղ զոհերի հիշատակին:

Ուսանողները Ծիծեռնակաբերդ բարձրացան մեծ Եռագույնը պարզած: Իսկ արդեն հուշահամալիրում՝ անմար կրակի մոտ, ուսանողներն ու դասախոսները  ձեռք-ձեռքի տված կիսաշրջան կազմեցին և մոմավառությամբ իրենց աղոթքն ուղղեցին առ Աստված: 

Զոհերին նվիրված հուշակոթողի սրտում վառվող կրակին մեկտեղվեց Հայր Մերն ու ձուլվելով այդ սրտից ելնող ծխին՝  հառնեց երկինք...

Արմինե Մկրտումյան