Պատրաստված տղա էր, զենքի հետ անփույթ չէր վարվի. գնդապետը Արցախում մահացած զինվորի մասին

Մարտի 17-ին, Արցախի Պաշտպանության բանակի հարավային ուղղությամբ տեղակայված զորամասերից մեկի պահպանության տեղամասում նախնական տվյալներով ՝ զենքի օգտագործման կանոնների խախտման արդյունքում, մահացու վիրավորում էր ստացել ՊԲ 19-ամյա զինծառայող Հովհաննես Ռազմիկի Հարությունյանը: ՀՀ Քննչական կոմիտեի Զինվորական քննչական գլխավոր վարչության երկրորդ կայազորային քննչական բաժնում հարուցվել է քրեական գործ՝ զինծառայողի մահվան դեպքի մասով։

19 ամյա զինծառայողը Արմավիրի մարզի Արևիկ գյուղից էր, սակայն վերջին տարիներին ապրում էր ընտանիքի հետ միասին Արագածոտնի մարզի Մուղնի գյուղում: Նա մինչ բանակ զորակոչվելը ուսանել է Արմավիրի «Տիգրան Մեծ » ռազմամարզական վարաժարանում, 2014-2015 ուստարվա շրջանավարտ է: Վարժարանի ուսուցչական-հրամանատարական կազմը և նրա հարազատները չեն հավատում, որ Հովհաննեսը զենքի հետ անփույթ է վարվել, քանի որ մարտական բարձր պատրաստվածություն է ունեցել, զենքին հիանալի տիրապետել է:

«Մեզ համար նա հերոս է, զենքի հետ անփույթ վերաբերվողի վրա այրվածքներ կլինեին`չկան, նա զինվոր էր բառի ամբողջ խորությամբ, վարժարանում օրինակելի սան է եղել, համոզված եմ՝ բանակում ևս օրինակելի է եղել իր իմացությամբ և գործողություններով, ափսոս ինստիտուտ չկարողացավ ընդունվել, պատրաստված տղա էր օդադեսանտային էր ուզում դիմել, ատամի հետ կապված խնդիր ուներ, պետք է բուժեր, որ կարողանար ընդունվել, բայց փող չունեին»,- newspress.am-ի հետ զրույցում ասաց «Տիգրան Մեծ» ռազմամարզական վարժարանի պետ, գնդապետ Կորյուն Ղումաշյանը:

Գնդապետ Ղումաշյանը պատմեց, որ Հովհաննեսի ընտանիքը ապրում է ծանր սոցիալական պայմաններում, նրա եղբայրը ևս ռազմարզական վարժարանի սան է, երկուսով ցանկացած աշխատանք կատարել են ընտանիքին օգնելու համար, Մուղնի գյուղում ապրում են տնակում. «Խեղճ ու կրակ ընտանիք է, այս պահին լուրջ աջակցության կարիք ունեն»,-եզրափակեց գնդապետը:

Այսօր զինծառայողի մարմինը հողին են հանձնելու: