Փաշինյանը քաղաքացիական պատերազմի առաջ կանաչ լույս է վառում․ «Հրապարակ»

«Հրապարակ»-ը գրում է․

Անամոթության, սուտասանության, ցինիզմի հարցում չեմպիոն իշխանությունններն անցած երկու օրերին խորհրդարանում` կառավարության անցած տարվա հաշվետվության քննարկումը վերածեցին քաղաքական օպոնենտներին մրոտելու, իրենց սուրբ ու հրեշտակ ներկայացնելու զավեշտալի մի ներկայացման։ Պատմական անցքերը խեղաթյուրելով, հակադաշնակցական ելույթներով, փորձելով ապացուցել, որ ոչ թե իրենք են դավաճանը, այլ բոլոր նրանք, ովքեր իրենց ասում են՝ աչքների վերեւը հոնք կա, եւ հատկապես` դաշնակցականները։
Հայրենիքը հանձնածներն իրենց մեծագույն ձեռքբերումների շարքում, բնականաբար, հիշատակում էին ասֆալտը, մի քանի դպրոց-մանկապարտեզների կառուցումը: Բայց ուշագրավն այն է, որ անգամ հայրենիքի հանձնումն էին որպես մեծ հաջողություն ներկայացնում` այն փաթեթավորելով պետական սահման ունենալու եւ սահմանազատման գործընթացի տակ: Ասենք, Տավուշից 4 գյուղի հանձնումը թշնամուն համարում են դարի հաղթանակ՝ մոռանալով, որ 2021 թվականին գրած իրենց ծրագրում Շուշիի եւ Հադրութի դեօկուպացիայի եւ այլ մեծամեծ խոստումներ էին տալիս: Իսկ իր ամփոփոիչ խոսքում Նիկոլ Փաշինյանն ուղղակի կանաչ լույս վառեց Հայաստանում քաղաքացիական պատերազմի առաջ՝ ակամայից խոստովանելով, որ վերջին շրջանի հակաարցախյան ատելության գեներացնողն իշխանությունն է` ամենաբարձր կաբինետներում նստած ՔՊ-ականները: Եվ հասկացվեց, որ երկրի ներսում բախումների վտանգը շատ ռեալ է` իշխանություն պահելու համար սրանք ամեն ինչի են ունակ։ 

Երեկ, մինչ հանրությունն իր ցասումն էր հայտնում իշխանական լրատվականներից մեկում արցախատյաց տիկնոջ բարբաջանքների հետ կապված, որն ասում էր, որ «արցախցիներին գյուլլեն՝ ափսոս ա... պիտի սենց հողին հավասարցնեն», Նիկոլ Փաշինյանն այդ կնոջ թեզը պետության թիվ մեկ ամբիոնից էր բարձրաձայնում` մի քիչ այլ բառամթերքով։ Նա ելույթի մեծ մասը հատկացրեց Ղարաբաղյան շարժմանը: Նորից իր հոգեգար մտքերը բարձրաձայնեց, թե այդ շարժումը կործանարար էր, հայաստանցիները 30 տարի լավ չեն ապրել, որովհետեւ ամեն ինչ զոհաբերել են հանուն Արցախի. «Շուրջ 30 տարի մենք կառուցել ենք պետության մի մոդել, որը հիմնականում եւ առավելապես նվիրված է եղել Ղարաբաղի հարցի լուծմանը, Ղարաբաղյան շարժմանը եւ հանուն դրա ամեն ինչ զոհաբերելու տրամաբանությանը»։ Ղարաբաղյան շարժումը շարունակելու ցանկացած փորձ, ըստ պետության առաջին դեմքի, կործանարար է, որովհետեւ այն եղել եւ լինելու է գործիք` Հայաստանի անկախությունը, ինքնիշխանությունը թույլ չտալու համար։ «Ղարաբաղի հարցի մեր պատկերացրած լուծման համար, մի շարք արտաքին դերակատարների համար Ղարաբաղի հարցը միջոց է՝ մեր անկախությունը, պետականությունը, զարգացումը, բարեկեցությունը թույլ չտալու, ապա եւ մեր պետականությանը վերջ դնելու համար»,- հայտարարեց Փաշինյանը:

Հայտնի է, որ մարտի 29-ից արցախցիները պայքարի են դուրս եկել, իշխանություններին մի քանի պահանջագրեր են ներկայացրել՝ հետամուտ լինել իրենց թե՛ սոցիալական, թե՛ քաղաքական պահանջների իրականացմանը, այդ թվում՝ հատկապես կարեւորելով վերադարձն Արցախ: Եվ փորձում են ամեն ինչ անել, որ Ղարաբաղի մի քանի հազարամյա էջը չփակվի։ Սակայն իշխանությունները, արցախցիների պահանջները կատարելու փոխարեն, մտել են նրանց հետ «բազառի» մեջ: Նախ` առաջարկեցին Ազատության հրապարակում տեղադրված վրանն ապամոնտաժել, որի դիմաց խոստացան, թե երկու ամսով կերկարաձգեն սոցիալական աջակցության ծրագիրը` 50 հազար դրամը, իսկ մերժում ստանալուց հետո պաշտոնատար անձանց մակարդակով սկսեցին հոխորտալ ու պահանջել, որ չերկարաձգեն Արցախի նախագահի լիազորությունները։ Զուգահեռ` ֆեյքերի ՊՈԱԿ-ի միջոցով ատելության քարոզ սկսվեց, որին մասնակցում են տարբեր սորոսական դեմքեր, արցախցիներին «գյուլլել» առաջարկող տգետ կանայք, եւ երեկ` արդեն իր դեմքով, միացավ Նիկոլ Փաշինյանը։ Բանն այն է, որ իշխանությունում լուրջ անհանգստություններ ունեն  արցախցիների պայքարի եւ նրանց ցուցաբերած համառության առումով, արցախցիներին դիտարկում են որպես բողոքական անվերահսկելի զանգված եւ վախենում են Արցախի ժողովրդի շուրջ հայ ազգի համախմբումից, որը կարող է իրենց իշխանազրկել։ Բացի այդ, Ալիեւը նույնպես չի դադարում խոսել այս մասին՝ պահանջելով, որ Հայաստանում խեղդվեն «ռեւանշիզմի ծիլերը», եւ Նիկոլ Փաշինյանը՝ որպես Ալիեւի հնազանդ աշակերտ, երեկվա իր հայտարարությամբ փորձում էր դա իրականացնել: Այդ ծրագրի մաս են կազմում հայաստանցի-արցախցի տարանջատումն ու ատելությունը, «Արցախը Հայաստանն է պահել» թեզը եւ արցախցիներին անգամ սոցիալական աջակցությունից զրկելու քարոզչությունը` «գնացեք, աշխատեք, ձեր գլուխը պահեք» կարգախոսով: Գուցե վաղը նոր գործիքակազմ էլ ստեղծեն, ասենք` ինչ-որ սադրիչների ուղարկեն Ազատության հրապարակ, ինչպես նախօրեին ուղարկել էին Արցախի ներկայացուցչության մոտ: Եվ «պետությունը, պետականությունը չկորցնելու» կեղծ, հորինված թեզով լռեցնեն արցախցիների ձայնը ու փակեն արցախյան էջը։