Դոնի-Ռոստովում կործանված օդանավում հայեր չկան

Ռուսաստանի Դոնի Ռոստով քաղաքի օդանավակայանում այսօր՝ մարտի 19-ին, տեղի ժամանակով 03։50-ին կործանվել է FlyDubai ավիաընկերությանը պատկանող Boeing 737-800 ուղեւորատար օդանավը, հաղորդում է Lifenews-ը:

Զոհվել են բոլոր 55 ուղեւորները եւ անձնակազմի 6 անդամները: Օդանավն ընկել է թռիչքուղուց 50-100 մետր հեռավորության վրա, որի հետեւանքով այն մի քանի մասի է բաժանվել:

Այս վթարի կապակցությամբ ԱԳՆ մամուլի քարտուղար Տիգրան Բալայանը իր միկրոբլոգում հայտնել է, որ զոհվածների թվում հայեր չկան:

«Զոհվածների նախնական ցանկում հայկական անուններ չկան։  Ցավակցում ենք զոհերի հարազատներին և մերձավորներին»,-գրել է նա:

Մինչ այդ բալայանը նշել էր, որ Դոնի Ռոստովում ՀՀ գլխավոր հյուպաստոսությունը ճշտում է զոհերի մեջ ՀՀ քաղաքացիների առկայությունը։