Արցախցիների վերադարձի հարցն օրակարգից հանելն անթույլատրելի է․ Արման Թաթոյան

Արցախցիները պետք է ունենան մեր երկրում արժանապատիվ ապրելու իրավունք։ Այս մասին լրագրողների հետ զրույցում ասաց ՀՀ մարդու իրավունքների նախկին պաշտպան Արման Թաթոյանը։

Նա ցավով է նշում, որ արցախահայության հանդեպ ատելություն է քարոզվում։ 

«Սա նաև Հայաստանի հայ հասարակությունը պառակտող արտավորող երևույթ է»,- ասաց Թաթոյանը՝ նշելով, որ սա պետք է կանխարգելել։

Մատնանշելով արցախցիների խնդիրները՝ կապված նրանց ինտեգրման և արժանապատիվ ապրելու իրավունքի հետ, Արման Թաթոյանը, մասնավորապես առանձնացրեց երկու դիտարկում․ դրանցից մեկը արցախահայության իրավունքների պաշտպանության վիճակն է, որը հիմնված է արդարության սկզբունքի վրա, իսկ երկրորդը` արցախցիների վերադարձը պատմական հայրենիք: 

«Այսօր արցախցիների պայքարը տեղի է ունենում սոցիալական ցանցերում,  հրապարակային աղբյուրներով արցախցիների նկատմամբ անթույլատրելի, շատ բարձր աստիճանի ատելության պայմաններում։ Նպատակային քարոզվում է ատելություն, թշնամանք։ Սա հայ ժողովրդին, միասնական ժողովրդին պառակտելու քաղաքականություն է։ Ռեալ այդ վիճակն է։ Մեր գերխնդիրն է,  մեր արտաքին մարտահրավերներն այնպիսին են, որ մեզ անհրաժեշտ է  համերաշխություն, համահայկական համերաշխություն»,- ասաց Թաթոյանը։

Արման Թաթոյանը նաև նկատեց, որ բոլորն էլ ուզում են աշխատել, և այստեղ չի կարող ողորմության հարց բարձրացվել։

«Ողորմության հարց չպետք է լինի։ Տասնյակ հազարավոր մարդիկ անելանելի վիճակում են, մարդկային ճակատագրերի, երեխաների իրավունքների հարցն է։ Ես իմ աջակցությունն եմ հայտնում, պետք է հասկանալ՝ լրացուցիչ ինչ ջանքեր, միջոցներ ձեռնարկել այս հարցերը լուծում ստանալու համար»,- ասաց Թաթոյանը՝ հավելելով, որ արցախցիները հայ ժողովրդի մի մասնիկն են, տարբերություն չկա, ըստ այդմ էլ պետք է լինի վերաբերմունքը։

Նա անթույլատրելի է համարում արցախցիների վերադարձի  հարցն օրակարգից հանելը։ Ըստ Արման Թաթոյանի` ՀՀ իշխանությունները չեն կարող որոշել հազարամյակների պատմության հարցը։ Նա ընդգծում է՝ խոսքը հումանիտար հարցերի մասին է։

«Արցախցիների արժանապատիվ ապրելու իրավունքի ու վերադարձի մասին է խոսքը․ սա չի կարելի հակադրել մեկը մյուսին»,- ասաց Թաթոյանը։