Վարչապետը պետբյուջեի հաշվին է շտկում ազգականների հասցրած վնասները

ՀՀ կառավարությունը 677,600.0 հազար դրամ է հատկացնում «Մելիորացիա» ՓԲԸ-ին՝ Արարատի, Արմավիրի, Գեղարքունիքի և Սյունիքի մարզերում հակահեղեղային միջոցառումներ իրականացնելու համար: Մասնավորապես կամրացվեն Արաքս գետի վթարային վիճակում գտնվող ափերը, և որոշ աշխատանքներ Սյունիքի, Արարատի և Արմավիրի մարզերի տարածքներում:

Նշենք, որ հատկապես Արարատի մարզի հատվածից Արաքս գետի ափերի ամրացման խնդիրն այլ է: Մի քանի տարի առաջ բարձրացավ, այսպես կոչված կապույտ ավազի արդյունահանումը և դրա հետևանքները Արաքս գետի համար: Արաքս գետի հարակից տարածքներում տարածված է այդ կապույտ ավազը, որն օգտագործվում է շինարարության մեջ և հայտնի է առավել ամուր, որակական հատկանիշներով:

Բնապահպանության նախարարությունը համապատասխան ստուգումներ անցկացրել է: Դեռևս 2015թ-ի Բնապահպանության նախարարը Արամայիս Գրիգորյանը հաստատել էր, որ Արաքսը հունից շեղվել է և համապատասխան անձանց հանդեպ պատժամիջոցներ են կիրառվել. Որոշ շահագործողների արգելվել է հետագա շահագործումը: Նշենք, որ Արաքս գետի ափերին կապույտ ավազ արդյունահանում է ՀՀ վարչապետ Հովիկ Աբրահամյանի եղբայրը` Ջոնիկ Աբրահամյանը: Նշենք, որ ըստ hetq.am-ի տվյալների, նրան է պատկանում «Ավազահատիկ» ՍՊԸ-ի 30% բաժնեմասը, ընկերությունը ղեկավարում է Մասիս քաղաքի բնակիչ Լևոն Միքայելյանը: Այս ՍՊԸ-ին 2012թ.-ին տրամադրվել է Արարատի մարզի Նորամարգ համայնքի ավազի հանքի արդյունահանման թույլտվություն: Նորամարգի համայնքապետարանը «Ավազահատիկ» ՍՊԸ-ի հետ կնքել է մոտ 12 հա հողի վարձակալության պայմանագիր, որից միայն 1 հա է օգտագործվում ավազի արդյունահանման նպատակով:

Ավազն արդյունահանվում է Սևջուր և Արազի վտակների տարածքից: Հենրիկ Աբրահամյանի որդին` Հովհաննես Աբրահամյանը ևս ավազի հանքեր ունի: Նա «Մեծն Հովնան» ՍՊԸ-ի 100 % բաժնետերն է: Ընկերությունը շահագործում է Արարատի մարզի Արաքսավան համայնքի տարածքում գտնվող Արաքսի ավազանի հանքավայրը: Թույլտվությունը ստացել է 2012թ-ին: Վարչապետի եղբորորդին ավազն ստանում է հենց Արաքս գետից:

Այն, որ ավազի արդյունահանման հետևանքով Արաքսը հունը փոխել է, Բնապահպանության նախարարը ևս ընդունել է, իսկ հունը փոխելը նաև նշանակում է, որ գետը տարածվել է դեպի ՀՀ տարածքի կողմը` փոխելով պետական սահմանային գիծը` ի վնաս Հայաստանի: Վարչապետը`իր ազգականների ստեղծած խնդիրները,լուծելու համար պետբյուջեից գումար է հատկացրել` շտկելու. ամրացնելու Արաքս գետի ափերը: