Հայաստանի ՏՏ ոլորտի արտադրանքի զգալի մասը արտահանվում է ԱՄՆ

Հրապարակվել է Ձեռնարկությունների ինկուբատոր հիմնադրամի «Հայաստանում տեղեկատվական և հեռահաղորդակցության տեխնոլոգիաների ոլորտի հետազոտություն» զեկույցը, որտեղ ամփոփվել են 2015թ-ի ոլորտի ցուցանիշները:

Տեղական ընկերությունների մասնաբաժինը ոլորտի ընդհանուր եկամուտների մեջ կազմել է 50%, իսկ ծրագրային ապահովման և ծառայությունների ոլորտի 44 խոշոր ընկերությունները ձևավորում են ոլորտի ընդհանուր հասույթի 54%-ը:

Նշենք, որ ՏՏ ոլորտի ընկերությունների կեսից ավելին մասնագիտացած են համակարգչային ծրագրերի մշակման գործում:

2015թ.-ի արտահանման ծավալները զգալիորեն աճել են՝ հասնելով $214.4 մլն, ինչը կազմում է ծրագրային ապահովման եւ ծառայություններ ոլորտի (առանց ինտերնետային ծառայություններ մատուցող ընկերությունների) ընդհանուր եկամուտի 50%-ը:

ՏՏ ոլորտի ընկերությունների ավելի քան 50%-ը արտահանում է սեփական արտադրանքն ու ծառայությունները: 2015թ-ին ստեղծվել է 1200 նոր աշխատատեղ, սակայն ոլորտը դեռևս 2000 մասնագետների կարիք ունի:

Զեկույցի համաձայն՝ արտահանումների առավելագույն մասը` մոտ 79.5%-ը, ուղղվում է ԱՄՆ և Կանադա, 10.8%-ը` Եվրոպա, իսկ երրորդ տեղում Ռուսաստանն ու ԱՊՀ երկրներն են, որտեղ ուղղվում է արտահանումների 8.4%-ը:

Այլ երկրների շարքում հայկական ծառայությունների նկատմամբ ամենամեծ պահանջարկը ներկայացնում է ԱՄԷ-ն, որը հիմնականում արտապատվիրում է հարմարեցված հաշվապահական, բանկային և ֆինանսական ծրագրեր:

Հիշեցնենք, որ վերջին երկու տարիներին հայկական ՏՏ ոլորտը դժգոհում է Հայաստանում ԱՄՆ դեսպանատան վիզային աշխատանքից, որի կամայական աշխատանքների արդյունքում ոլորտի մասնագետները չեն կարողանում աշխատանքային գործուղումների մեկնել ԱՄՆ, հենց ԱՄՆ-ն է, որտեղ արտահանվում է ՀՀ ՏՏ ոլորտի արտադրանքի հիմնական մասը: