ԸՕ-ից բողոքում են այն ուժերը, որոնց խորհրդարան մտնելու հնարավորությունը կասկածի տակ է. ՀՀԿ

«Ասել եմ ու ասում եմ, որ ԸՕ-ից բողոքում են այն քաղաքական ուժերը, որոնք որ հաշվարկել են իրենց ռեսուրսը և խիստ կասկածանք ունեն գալիք ընտրություններում իրենց հաջողությունների վրա»:

ԱԺ ճեպազրույցի ժամանակ հայտարարեց ԱԺ ՀՀԿ խմբակցության ղեկավար Վահրամ Բաղդասարյանը: Ըստ նրա՝ ոչ միայն այդ ուժերը չեն կարող լինել մեծամասնություն, այլև կասկածի տակ է խորհրդարան մտնելը:

«Պետք է քաղաքական կամք և իշխանությունը ունի դա. մենք պետք է հասնենք նրանք, որ ընտրությունները լինի թափանցիկ: ԸՕ-ն պետք է լինի այնպիսին, որ հաշվի առնվի ընդդիմության և հանրության առաջարկները, որպեսզի փարատվեն կասկածները»,-ասաց նա:

Անդրադառնալով իր կուսակից ընկերների՝ մասնավորապես Մանվել Գրիգորյանի, Առաքել Մովսիսյանի, Սամվել Ալեքսանյանի և Մհեր Սեդրակյանի պահվածքին, և պատասխանելով հարցին թե արդյո՞ք այդ պատգամավորնեն ունեն օրենսդրական ինտելեկտ և տեղ կունենա՞ն հաջորդ խորհրդարանում, Բաղդասարյանը պատասխանեց. «Մենք իրավունք չունենք որևէ մեկին մասնակցությունն արգելել խորհրդարանական ընտրություններին: Ժողովուրդը պետք է որոշի, թե ով պետք է լինի խորհրդարանում, թե ինչպիսի պատգամավոր պետք է լինի ԱԺ-ում: Որևէ մեկին ասել, թե դու իրավունք չունես մասնակցել ընտրությունների, կարծում եմ՝ այնքան էլ ճիշտ չէ: Ես այն կարծիքն եմ, որ ԱԺ-ն պետք է խայտաբղետ լինի և լինեն նաև փորձով մարդիկ»,-ասաց ՀՀԿ խմբակցության ղեկավարը:

Ինչ վերաբերում է ԱԺ ՀԱԿ խմբակցության պատգամավոր Նիկոլ Փաշինյանի և ՀՀԿ-ական պատգամավորներ Կարեն Ավագյանի և Առաքել Մովսիսյանի պահվածքին՝ Բաղդասարյանը նկատեց, որ կան գրագետ բառապաշարով պատգամավորներ և կան պատգամավորներ, որոնք այդքան էլ հարուստ բառապաշար չունեն և այդ է իրենց լեքսիկոնը:

«Ես հորդորում եմ, որ մենք նման բառապաշարով խորհրդարանում չխոսենք և ԱԺ-ում շոուներ չսարքենք: Սակայն ես չեմ կարող բոլորին լռեցնել»,-ասաց Բաղդասարյանը;