Կոմպրոմիսային տարբերակ քննարկվեց, երթուղիներն իրար չպետք է խանգարեն․ ՏԿԵ փոխնախարար

Քաղաքացիները պահանջում էին, որ 59 երթուղին մտնի բնակավայր, որպես կոմպրոմիսային առաջարկ քննարկվեց, որպեսզի 59 համարը մոտ 100 կամ 150 մետր ավել գնա և հասնի Փոստի շենք: Այս մասին այսօր՝ ապրիլի 10-ին, լրագրողների հետ զրույցում նշեց ՏԿԵ փոխնախարար Արմեն Սիմոնյանը՝ անդրադառնալով Քասախ և Պռոշյան գյուղերը Երևանին կապող տրանսպորտին:

«Այդ դեպքում կստացվի, որ թե թիվ 25, թե թիվ 59 երթուղիները կգործեն, մենք կդիտարկենք այդ տարբերակը, եթե ընդունելի լինի նաև Երևանի քաղաքապետարանի համար, հարցը կարող է այդպես լուծվել: Նաև ժամանակ խնդրեցինք մասնակիցներից, որպեսզի քննարկենք և մեր պատասխանը այդ մասով տանք»,- ասաց նա:

Փոխնախարարը նկատեց, որ հարցը պետք է քննարկվի նաև «Մուլտի տրանսպորտի» հետ։

«Պետք է այնպես անել, որպեսզի երթուղիները մեկը մյուսին չխոչընդոտեն, չխանգարեն և բոլորը կարողանան օգտվել երթուղիներից։ Այսինքն` բոլորը գոհ մնան թե՛ քաղաքացիները և թե՛ փոխադրողները»,- ասաց նա։

Ինչ վերաբերում է խնդրին, որ «Մուլտի տրանսպորտ»-ի կողմից առաջարկվող «Գազելները» հարմարավետ չեն հաշմանդամություն ունեցողների համար և մարդիկ չեն կարողանալու օգտվել, ապա, փոխնախարարի խոսքով, կառավարության որոշմամբ, մրցութային կարգով տրանսպորտային միջոցներ կներգրավվեն, որոնցից առնվազն 10%-ը հարմարեցված կլինի նման քաղաքացիների տեղաշարժը ապահովելու համար:

Սակայն լինելու է մեկ տրանսպորտային միջոց, որի ժամը կհամաձայնեցվի բնաավայրի հետ։

«Այդ մասով հարցը լուծված է»,- ասաց փոխնախարարը։