Արցախցիները 2 իրատեսական պահանջ ներկայացրեցին՝ 40+10 ծրագիրը չդադարեցնել և արցախցիների իրավունքներից չհրաժարվել. Ակցիա

Արցախցիները կրկին բողոքի ակցիա են իրականացնում, այս անգամ կառավարության շենքի առաջ՝ պահանջելով իրենց իրավունքների վերականգնում ու սոցիալական խնդիրների լուծում։  

Նրանք նշում են, որ հայրենիքում արժանապատիվ կյանք են ուզում։

Լրագրողների հետ զրույցում արցախցիներից մեկը նշեց, որ իրենք տվյալ պահին իրատեսական 2 պահանջ են ներկայացնում, որոնք լուծելի են։

«Դա 40+10 ծրագրի շարունակությունն է այնքան ժամանակ, մինչև բնակապահովման ծրագիրը հասանելի լինի բոլորին»։

Ըստ նրա` նույնիսկ այն մարդիկ, ովքեր համաձայնել են օգտվել բնակապահովման ծրագրից,  այս պահի դրությամբ չեն կարող օգտվել, քանի որ շուկայում գնային փոփոխություն չի եղել։

«Այն թեզը, թե գնացեք, աշխատեք՝ հասկացանք, կգնանք, կաշխատենք և մյուս հարցերը կլուծենք, բայց բնակարանով ապահովելու հարցն աշխատելով լուծել հնարավոր չէ»,-ասաց նա։

Ըստ նրա՝ կոմպակտ բնակությամբ պետք է ապահովեն արցախցիներին, որը հնարավորություն կտա քաղաքային բնակչությանը տեղավորվել քաղաքային միջավայրում, գյուղականին՝ գյուղական։ «Այսօր ասում են՝ արցախցիները՝ բոլորն ուզում են Երևանի կամ Երևանամերձ շրջաններում ապրել։ Դա արցախցիների խնդիրը չէ, ուղղակի հիմնական աշխատանքը հենց Երևանում է»,-ասաց նա։

Երկրորդ պահանջը վերաբերում է արցախցիների իրավունքներից չհրաժարվելուն։ «Քննարկում են, որ միջազգային դատարանից հայցերը հետ են կանչելու, իսկ այս հարցերի մեծ մասը վերաբերում է Արցախին։ Հիմա հարց՝ Արցախում տեղի է ունեցել էթնիկ զտում, հիմա ի՞նչ՝ իշխանությունները կարո՞ղ են ասել, որ Արցախում էթնիկ զտում չի՞ եղել և մենք ոչ մի խնդիր չունե՞նք դրա հետ։ Մնացած գործողությունների շարունակությունը հաշվի առնելով, ես դա էլ եմ հնարավոր համարում, որ նման իրավիճակի գանք կանգնենք»,- ասաց նա։