Այսօր ակնհայտ է ազգային համախմբման կարիքը․ՀՀԿ-ն նշում է իր հիմնադրման 35-ամյակը

Այսօր Հայաստանի Հանրապետական կուսակցությունը նշում է իր հիմնադրման 35-ամյակը՝ կարևորագույն հանգրվան մեր պետականության նորագույն պատմության մեջ։
 

35 տարի շարունակ ՀՀԿ-ն եղել է ազգային պետականության, ինքնիշխանության, անվտանգային համակարգերի և արժեքային քաղաքականության հետևողական կրողը։ Սակայն Հանրապետական կուսակցությունը միշտ առանձնացել է ոչ միայն գաղափարական հաստատակամությամբ, այլև իր գործով։ Այս կուսակցությունը հաղթանակների և խաղաղության կուսակցություն է՝ բառի ամենախոր իմաստով։ Հաղթանակներ՝ թե՛ ռազմի դաշտում, թե՛ դիվանագիտական ճակատում։ Խաղաղություն՝ հիմնված արժանապատվության և ազգային հիմնավորումների վրա։
 

ՀՀԿ-ի պատմական ուղին սկիզբ է առել Աշոտ Նավասարդյանի գաղափարական տեսլականից, ամրացել Վազգեն Սարգսյանի ազգային-պետական կամքով, խորացել Անդրանիկ Մարգարյանի համակարգային կառավարմամբ և հասել ռազմավարական խորության՝ ներառելով վերոնշյալը ՀՀ երրորդ նախագահ, ՀՀԿ նախագահ Սերժ Սարգսյանի առաջնորդությամբ։
 

Արցախյան հիմնախնդրի բանակցային գործընթացում Հանրապետական կուսակցությունը դրսևորել է դիվանագիտական ճշգրտություն և պետական մտածողության բարձր մակարդակ։ Մասնավորապես՝ 2016 թվականի Ապրիլյան քառօրյա պատերազմի ընթացքում Հայաստանին հաջողվեց ապահովել ռազմաքաղաքական հաղթանակ, որի հիմքում դրված էր պետական շահի անդրդվելի պաշտպանությունը։ՀՀ երրորդ նախագահ Սերժ Սարգսյանի պետականամետ և համարձակ ղեկավարությունն էր, որ հաստատեց միջազգային հանրության աչքում այն իրողությունը, որ Հայաստանը պատրաստ է ոչ թե զիջումների, այլ՝ արժանապատիվ խաղաղության։ Այդ օրերին անգամ ադրբեջանի նախագահն ընդունում էր, որ միջազգային ճնշումները նրան մղում էին Արցախի անկախության ճանաչման հեռանկարին։
 

Սա պատահականություն չէր։ Դա հետևողական քաղաքականության, ուժեղ կառավարման և ազգային տեսլականի արդյունք էր։ Հանրապետական կուսակցությունն այս տարիներին ձևավորել է պետական մտածողության ավանդույթ, որը զերծ է եղել պոպուլիզմից և միշտ հիմնված է եղել պատասխանատվության, պրագմատիզմի և ազգային շահի առաջնահերթության վրա։
 

Այսօր, երբ աշխարհը և տարածաշրջանը կանգնած են անընդհատ փոփոխությունների և անվտանգային անորոշությունների առաջ, առավել քան երբևէ ակնհայտ է գաղափարական հստակության, ազգային համախմբման և քաղաքական փորձառության կարիքը։
 

Մենք՝ ՀՀԿ երիտասարդ սերնդի ներկայացուցիչներս, այս հոբելյանը համարում ենք ոչ միայն անցյալի գնահատում, այլ՝ նոր պատասխանատվության մեկնակետ։ Մենք պարտավորվում ենք արժանապատվորեն կրել հաղթական այդ ժառանգությունը և ամուր պահել այն արժեքները, որոնք կերտել են մեր պետությունը։

Հանրապետականը եղել է, կա և մնալու է՝ որպես հաղթանակների և արժանապատվ խաղաղության կուսակցություն։
 

«Հանրապետականի ձայնը եղել է հնչեղ և այդպես էլ մնալու է»։