Օրինական և ապօրինի պահվող զենքերի գործադրմամբ հանցագործությունների թիվն աճել է

2023թ. հունվարի 1-ից մինչև 2025թ. փետրվարի 28-ը ներառյալ,  ըստ ՀՀ ՆԳՆ-ում արձանագրվել է հրազենի գործադրմամբ կատարված հանցագործության 191 դեպք, որից, որից 83-ը կատարվել է օրինական զենքով:

Այս մասին, NEWSPRESS.am-ի հարցմանն ի պատասխան, նշել են ՆԳՆ-ից:

Թեև մենք խնդրել էինք տրամադրել 2020-2025թթ.ժամանակահատվածում տեղի ունեցած հրազենային հանցագործությունների  թիվը, սակայն ՆԳՆ-ից մեզ արձագանքել են, որ  2017-2023թթ. ընթացքում հրազենի գործադրմամբ կատարված հանցագործությունների վերաբերյալ ՀՀ ՆԳՆ ոստիկանության օպերատիվ կառավարման կենտրոնում հաշվառումներ չեն տարվել։

Մեզ տրամադրած տվյալների համաձայն 2023թ. ընթացքում արձանագրվել է 96 դեպք, որից 29-ը՝ օրինական զենքերով, իսկ 67-ը՝ ապօրինի պահվող: Իսկ 2024թ. ընթացքում 86 դեպք, որից 26-ը՝ օրինական զենքերով, իսկ 60-ը՝ ապօրինի պահվող: Այստեղ հարկ է ընդգծել, որ ընթացիք տարվա՝ 2025 թվականի հունվարի 16-ին, ՆԳ նախարարի ասուլիսի ժամանակ, նախարար Արփինե Սարգսյանը նշեց, որ Ներքին գործերի նախարարությունում 2024 թվականի 12 ամսվա ընթացքում գրանցեել է 109 նման դեպք է գրանցվել, որը 15-ով ավելի է նախորդ՝  2023-ին գրացված դեպքերից:

Թվերի անհամատեղելիությունը փորձեցինք հստակեցնել՝ կապ հաստատելով ՆԳՆ խոսնակ Նարեկ Սարգսյանի հետ: Վերջինս նշեց, որ մեզ տրամադրել են ոստիկանության օպերատիվ հաղորդագրությունների ավտոմատացված տեղեկատվական համակարգի հաշվառումների և նախնական վերլուծությունների հիման վրա արձանագրված թվեր: 

«Հրազենի գործադրմամբ կատարված հանցագործությունների որակումները, հրազենների օրինականության վերաբերյալ վերջնական տվյալները պարզ են դառնում քրեական վարույթի շրջանակներում»,-նշեց ՆԳՆ խոսնակը:

Այլ կերպ ասած՝ նախարարի ներկայացրած թվերը  քրեական վարույթի շրջանակներում արձանագրված թվեր են, որից պարզ է դառնում, որ իրականում, 2023-ի համեմատ, զգալի աճել է հանցագործությունների, այս դեպքում՝ հրազենի գործադրմամբ կատված հանցագործությունների թիվը:

Նկատենք, որ ընթացիք տարում, իսկ ավելի կոնկրետ 2025թ. հունվարի 1-ից մինչև փետրվարի 28-ը ներառյալ՝ 9 դեպք, որից 4-ը՝ օրինական զենքերով, իսկ 5-ը՝ ապօրինի պահվող:

 NEWSPRESS.am-ը հարցրել էր նաև, թե օրինական զենքի գործադրմամբ արձանագրված  հանցագործություններից քանիսն է կատարվել պարգևատրական զենքի կիրառմամբ, սակայն այս հարցը չի ստացել իր պատասախանը: