Հայաստանը պայքարում է կոռուպցիայի դեմ, սակայն մասնագետներ չունի

Գործադիրի այսօրվա նիստում հաստատեց, որ ԱՄՆ կառավարության կողմից Հակակոռուպցիոն խորհուրդը ստացել է 750 հազար դոլար, որը ուղղվելու է աշխատավարձերի վճարմանը, տեղափոխումների և թարգմանչական ծախսերի կատարմանը, ինչպես նաև` միջազգային փորձագետների ներգրավմանը: Հայաստանը կառուպցիայի դեմ պայքարող մասնագետներ չունի: Իրականացվելու են կոռուպցիոն ռիսկերի վերլուծություն, մշակվելու են մեխանիզմներ և կփորձեն նպաստել կոռուպցիոն ռիսկերի չեզոքացմանը: Հայաստանում կաշառք կարող են վերցնել, կարող են նաև կաշառք տալ, բայց պայքարել կաշառակերության դեմ՝ չեն կարող:

Ինչպես ասում են կոռուպցիան այնքան հին է, ինչպես մարմնավաճառությունը, ոչ մեկի վերջն է երևում, ոչ՝ մյուսի: Ուղղակի մարմնավաճառներն այնքան ազնիվ են, որ ազնիվ մարմնավաճառներ են աշխատում, իսկ կաշառակերներն անգամ մարմնավաճառների ազնվությունը չունեն: Հայաստանը, որպես հնագույն երկիր, ևս անմասն չէ հնագույն մասնագիտությունների արհեստավարժությունից, սակայն դարձյալ Հայաստանում մարմնավաճառները բաց և ազնիվ առևտուր են անում՝ ասենք Երևանյան լճի մոտ, Ծերեթելի, Լենինգրադյան և կոնկրետ ժամերի, իսկ կոռուպցիան կամ կաշառակերությունը ոչ ժամ ունի, ոչ պատարագ. 24 ժամ աշխատում է: Ունե՞նք որևէ ոլորտ, որտեղ կոռուպցիա չկա. կարող ենք միանշանակ ասել, որ ոչ, կոռուպցիան իր դրսևորումներն ունի բոլոր ոլորտներում, նաև դրանով է բացատրվում Հայաստանում ունևորների և չունևորների միջև խոր անջրպետը:

Համաձայն Թրանսփարենսի Ինթերնեշնլի կոռուպցիայի ընկալման ինդեքսի՝ Հայաստանը 176 երկրների շարքում զբաղեցնում է պատվավոր 96-րդ տեղը:

Հիշեցնենք, որ Հայաստանում ԵՄ պատվիրակության դեսպան Պյոտր Սվիտալսկին ասել էր, որ պետք է լուրջ ջանքեր գործադրել կոռուպցիայի դեմ պայքարի ուղղությամբ, այլապես որևէ օտարերկրյա ներդրում չի արվի, եթե երկրի իմիջի վրա ստվեր են գցում կոռուպցիայի դեմ պայքարի անբավարարության խնդիրները:

Ինչպես գիտենք` Հայաստանում օտարերկրյա ներդրումները նվազել են: Իհարկե, կոռուպցիան միակողմանի չէ, այլ երկկողմանի և տալիս են, և վերցնում, երկու կողմը գոհ է, այդ է պատճառը նաև, որ այս հին մասնագիտությունը ծաղկում է, իսկ երկրի իմիջի մասին փորձում են մտածել ՝օրինակ 750 հազար դոլար վերցնելով, հակակոռոպցիոն խորհուրդներ ձևավորելով, առերևույթ պայքարելով, ինչպես Դոն Կիխոտը` կարճ ասած ներկայանալ կոռուպցիայի դեմ պայքարող երկիր:

Վերջին շրջանի բացահայտված կոռուպցիայի օրինակներից է Սննդի անվտանգության պետական ծառայության աշխատակիցները ժամկետանց սննդի վրա աչք փակելու համար գումար էին վերցրել, ՀՀ ՊՆ ՌՈ Հատուկ օպերատիվ ծառայության կողմից, առանձնակի մեծ չափերի կաշառք ստանալու ժամանակ, ձերբակալվել էր ՀՀ ՊՆ դեպարտամենտի աշխատակից Արսեն Ղարիբջանյանը։ Հիմա վերադառնանք 750 հազար դոլարին, որով պետք է Հայաստանը պայքարի կոռուպցիայի դեմ: Լավ, ո՞վ պայքարի, որ կյանքում գեթ մեկ անգամ կաշառք չի վերցրել: Եվ քանի որ կառավարական մակարդակով հասկացել են, որ նման անգամ մեկ մարդ չկա, շառից փորձանքից հեռու լինելու համար հրավիրելու են ազնիվ, կոռուպցիայի դեմ պայքարող մասնագետներ: Իհարկե ոչ արմատական պայքարող մասնագետներ, քանի որ այդ դեպքում բանտերը չեն հերիքելու բոլոր կաշառակերներին ձերբակալելու համար կամ ո՞վ պետք է ձերբակալի. այս է խնդիրը: