Հովիկ Աղազարյանին 300 հազար դոլար են առաջարկել․ կաշառքի 2 գործ կա․ դատախազը միջնորդեց զրկել նրան անձեռնմխելիությունից (տեսանյութ)

ՀՀ գլխավոր դատախազ Աննա Վարդապետյանն Ազգային ժողովին միջնորդեց ՔՊ-ից հեռացված պատգամավոր Հովիկ Աղազարյանին զրկել պատգամավորական անձեռնմխելիությունից։

«Հակակոռուպցիոն կոմիտեում քննվող թիվ 62218423 քրեական վարույթով նախաքննության ընթացքում տվյալներ են ձեռք բերվել այն մասին, որ Սլավիկ Կարապետյանն իր կնոջ հոր՝ Աշոտիկ Կամավոսյանի խնդրանքով, 2023 թվականի օգոստոսի 8-ին դիմել է իր մտերիմ Սլավիկ Պողոսյանին, որպեսզի նա իր հերթին դիմի պաշտոնատար անձ հանդիսացող, օրենսդիր իշխանության ներկայացուցչին՝ 200.000-300.000 ԱՄՆ դոլար գումարի դիմաց, օգտագործելու ՀՀ ՍԱՏՄ պաշտոնատար անձանց նկատմամբ ունեցած ենթադրյալ ազդեցությունը՝ վերջինների կողմից, իրենց ծառայողական լիազորություններն օգտագործելով, Աշոտիկ Կամավոսյանի օգտին ապօրինի գործողություն կատարելու, այն է՝ առանց համապատասխան փաստաթղթերի կամ կեղծ փաստաթղթերով գյուղատնտեսական կենդանիներ արտահանելու գործընթացը կազմակերպելու համար:

Ստացված տվյալների համաձայն՝ Հայաստանի Հանրապետության օրենսդիր իշխանության ներկայացուցչի հետ հանդիպման վերաբերյալ պայմանավորվածություն ձեռք բերելուց հետո Աշոտիկ Կամավոսյանը և Սլավիկ Պողոսյանը նույն օրը մեկնել են Գեղարքունիքի մարզ, որտեղ Սլավիկ Պողոսյանը հանդիպում և քննարկում է ունեցել օրենսդիր իշխանության ներկայացուցչի հետ, ով ընդունել է վերոնշյալ առաջարկը»,- հայտարարեց դատախազը։