Սամվել Շահրամանյանին ադրբեջանական կողմը փոխանցել է ռուսալեզու փաստաթուղթ. Նիկոլ Փաշինյանն ու Հայաստանը ճանաչել են Ադրբեջանի տարածքային ամբողջականությունը. Վանեցյանը մանրամասներ է հայտնել

Արցախի նախկին նախագահները երեք անգամ Արայիկ Հարությունյանին համոզել են, որ հրաժարական չներկայացնի։ Այս մասին «24 News»-ի «Հետագիծ Նարեկ Գալստյանի հետ» հաղորդաշարի շրջանակներում հայտարարել է «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը. փոխանցում է «Փաստինֆոն»: 

«Վերջում Արայիկ Հարությունյանն ասել է՝ «ես այլևս չեմ կարողանում, Նիկոլ Փաշինյանն ու Հայաստանյան իշխանություններն ինձ այլևս չեն լսում, ես պետք է հրաժարական տամ»։ Վստահ եք, չէ՞, որ Սամվել Շահրամանյանը չէր երազում դառնալ նախագահ, նա այդ իրավիճակում ինչու՞ պետք է մտներ այդ բեռի տակ, բայց կար փոքր շանս։ Արայիկ Հարությունյանն ասել է, որ եթե ինքը մնա, Արցախը կորցնելու են, որևէ շանս չկա։ Որոշում է կայացվել, Արայիկ Հարությունյանն էլ այդ որոշման ջատագովն է եղել, որ Արցախի նախագահ ընտրվի Սամվել Շահրամանյանը, որը փորձել է անել ամեն ինչ, որ լուծի Արցախի ու Արցախի բնակչության հարցերը»,- ասել է Վանեցյանը։

Վանեցյանը պատմեց՝ երբ 2023-ին Ադրբեջանը ներխուժեց Արցախ, Սամվել Շահրամանյանին ադրբեջանական կողմը փոխանցել է ռուսալեզու փաստաթուղթ։

«Թղթում առաջին տողում գրված է եղել՝ նոր իրողությունների պայմաններում, երբ Նիկոլ Փաշինյանն ու Հայաստանը ճանաչել են Ադրբեջանի տարածքային ամբողջականությունը, այդ թվում՝ Արցախը, հիմա որոշում պետք է ընդունել, որ այլևս չկա այդ պետությունը։ Սամվել Շահրամանյանն էլ դիմել է խորամանկության, ասել է, որ խորհրդարանում չի կարող որոշումն անցկացնել, թուղթն ուղարկվել է Նիկոլ Փաշինյանին, որևէ արձագանք չի տվել, ասել է՝ ինչ ուզում եք, արեք։ Դրանից հետո Սամվել Շահրամանյանը հասել է նրան, որ ստեղծվել է հրամանագրի տեքստ, որը ոչ մեկ չի տեսել, ինչո՞ւ չենք տեսել, որովհետև այդ փաստաթուղթը չկա, դա արվել է միայն մի բանի համար, որ ապահովվի արցախցիների անվտանգությունը»,- նշել է Վանեցյանը՝ հավելելով, որ Հայաստանում Սամվել Շահրամանյանը հրամանագիրը չեղարկել է։