Ողջունելի է տեղեկությունը, որ Վրաստանի հավաքականի ֆան ակումբները ներողություն են խնդրել միջադեպի համար. Հակոբ Բադալյան

Քաղաքական վերլուծաբան Հակոբ Բադալյանը գրել է.

Այս գրառումս արել էի նախորդ տարի վիճակահանությունից հետո, երբ հայտնի դարձավ, որ Ազգերի լիգայի փլեյ օֆում հանդիպելու են Հայաստանի ու Վրաստանի ազգային հավաքականները:

Անցնող օրերին կայացած այդ հանդիպումների հաշվի, մեր հավաքականի խաղի, մեր ֆուտբոլի վիճակի մասին այս պահին չեմ ուզում խոսել, այստեղ պարզապես խոսքեր չկան:

Միեւնույն ժամանակ, անկասկած շատ տհաճ ու անցանկալի էր պատկերը Թբիլիսիում կայացած խաղից հետո, Վրաստանի հավաքականի մի քանի տասնյակ երկրպագուի մասնակցությամբ՝ ընդդեմ հայ երկրպագուների:

Նաեւ այդօրինակ միջադեպեր թույլ չտալը նկատի ունեի, երբ նախորդ տարի նշում էի, որ խաղից զատ, շատ կարեւոր է լինելու թույլ չտալ, որ որեւէ մեկը խաղն օգտագործի հայ-վրացական հարաբերությունը մեծ կամ փոքր սադրանքի ենթարկելու համար:

Երեւանում չեղավ որեւէ այդպիսի խնդիր, իսկ ահա Թբիլիսիում խաղի կազմակերպիչները փաստորեն չկարողացան զերծ պահել պատկերը տհաճ միջադեպից, որ արդեն իսկ պտտվում է սոցցանցային տեսանյութերով եւ թողնում իր նստվածքը:

Ողջունելի է տեղեկությունը, որ Վրաստանի հավաքականի ֆան ակումբները կապվել են հայաստանյան ֆան ակումբների հետ եւ ներողություն խնդրել միջադեպի համար: Բայց, նաեւ ցանկալի կլինի, որ այդ ներողությունն էլ պտտվեր սոցցանցերում, ինչպես պտտվում են միջադեպի կադրերը:

Խաղից առաջ էլ գրել էի, հայ-վրացական հարաբերությունը շատ կարեւոր, ռազմավարական նշանակության, բայց միեւնույն ժամանակ նուրբ եւ զգայուն մի հանգամանք է, որ պարունակում է իսկապես երկկողմ խնամակալություն ինստիտուցիոնալ բոլոր մակարդակներում: