Ցրտահարություն. ծիրանենիները վտանգված են

Մարտի 17-ին Տավուշի, Վայոց ձորի և Սյունիքի հովտային գոտիներում և Արարատյան դաշտում հիդրոօդերևութաբանները օդում կանխատեսել էին բացասական ջերմաստիճաններ. Օդի նվազագույն ջերմաստիճանը լուսադեմին ունեցել է հետևյալ ցուցանիշները, Արմավիրում -2, Մերձավանում -5, Արտաշատում -2, Արարատում -0,5, Ուրցաձորում -3, Աշտարակում -3, Երևանում -2…-4, Արենիում -1, Բագրատաշենում -2, Իջևանում -2 աստիճան ցուրտ:

Սպասվող ցրտահարությունների ֆոնին, Գյուղատնտեսության նախարարությունը զգուշացրել է հողօգտագործողներին առատ ոռոգել այգիները և գիշերային ժամերին հատկապես ծիրանենիների այգիները ծխեցնել:

ՀՀ ջրային տնտեսության պետական կոմիտեն հանձնարարել է հանրապետության ջուր օգտագործող ընկերություններին այդ օրերին գյուղացիական տնտեսություններն ապահովել ոռոգման ջրով: Այս երեք կառույցները գյուղացիներին օգնելու համար կարծես թե ամեն բան արեցին` տեղեկացրեցին, զգուշացրեցին և հանձնարարեցին:

Եղանակային վայրիվերումներից խուսափել հնարավոր չէ. ինչպես ասում են Արարատյան դաշտում ծիրանենին յոթ տարին մեկ անգամ է բերք տալիս: Այս տարի ծիրանենիների համար հատկապես տարին սկսվեց խնդիրներով:

Ինչ է պետք անել ցրտահարության ժամանակ. ծխեցնել, որը յուրաքանչյուր ծիրանի այգի ունեցող գիտի, և դրա համար հատուկ փոսեր են փորված այգիների տարածքներում, ծխեցնող նյութ են հավաքում և անհրաժեշտության դեպքում օգտագործում:

Ինչ վերաբերում է ոռոգմանը: ՋրՊետԿոմ-ը համապատասխան հայտարարություն արել է, սակայն խոսքը վերաբերում է Տավուշի, Սյունիքի հովտային շրջանների, Վայոց ձորի և Արարատյան դաշտի ՋՕԸ-երին:

Նշենք, որ այս մարզերում հիմնականում մեխանիկական ոռոգում է, այն է` պոմպերի միջոցով է կատարվում հիմնականում ոռոգումը և այդ է պատճառը, որ ոռոգման հետ կապված անընդհատ խնդիրներ է առաջանում:

Հոսանքը խնայելու համար պոմպակայանները հնարավորինս քիչ են օգտագործում, սակայն դրանից տուժում են ոռոգման աշխատանքները, սակայն սա այլ հարց է, այստեղ խոսքը գնում է ոռոգման շրջանում ոչ բավարար ոռոգում իրականացնելու մասին, իսկ այն, որ այս շրջանում, երբ ոռոգման նախապատրաստական աշխատանքները դեռ ընթացքի մեջ են, եթե ընթացքի մեջ են, ապա նշանակում է, որ ոռոգում ցրտահարության շրջանում կազմակերպելը այնքան էլ հեշտ չէ:

Հայաստանում պաշտոնական ոռոգման սեզոնը բացվում է ապրիլի մեկից, իսկ թե իրականում երբ են սկսում ջուր տալ հովտային շրջաններում: Այդ գործընթացը մինչև մայիս կամաց-կամաց կարգավորվում է, իսկ մինչ այդ համակարգում իրականացվում են նախապատրաստական աշխատանքներ և դեռևս համակարգը պատրաստ չէ ոռոգում իրականացնելու:

Այնպես որ հայտարարությունները դեռ ոչինչ չեն նշանակում:

Այսօր առավոտյան Արարատյան դաշտի հողօգտագործողներից մեկը հարցնում է մյուսին. «Տեսա՞ր, ծիրանը լրիվ սառուց էր կապել»: «Հա, մի հատ ծաղիկ չմնաց»,- պատասխանում է մյուսը:

Նշենք, որ առաջիկա օրերին ևս սպասվում են ցրտահարություններ: