Ադրբեջանը որպես ռուս ուղղափառ եկեղեցի է ներկայացնում Շուշիի Սբ Ամենափրկիչը

Բռնազավթված Արցախում Ադրբեջանի իշխանությունների կողմից, պատմաճարտարապետական հուշարձանների, խաչքարերի, ամբողջական բնակավայրերի, բնակելի թաղամասերի ոչնչացմանը զուգահեռ, իրականացվում է նաեւ Արցախի մշակութային ժառանգության իսկության խեղաթյուրման քաղաքականություն: Այս քաղաքականության անկյունաքարը հանդիսանում է հայկական մշակութային ժառանգության աղվանականացումը:

Ինչպես փոխանցում է Հայկական լեռնաշխարհի մշակութային ժառանգության օմբուդսմեն Հովիկ Ավանեսովը, Ադրբեջանի պետական մակարդակով իրականացվող աղվանականացման քաղաքականությունը դուրս է եկել Արցախի, Ուտիքի եւ Նախիջեւանի տարածքներից՝ թիրախավորելով եւ յուրացնելով Հայաստանի Հանրապետության, Արեւմտյան Հայաստանի եւ Վրաստանի տարածքներում գտնվող մի շարք պատմաճարտարապետական հուշարձաներ: Մասնավորապես՝ Տաթեւի վանական համալիրը, Գոշավանքը, Էջմիածնի մայր տաճարը, Հառիճավանքը, Հաղպատի վանական համալիրը, Հաղարծին վանական համալիրը, Ախթալայի Սուրբ Աստվածածին վանքը, Ապարանի Սուրբ Պողոս-Պետրոս բազիլիկ եկեղեցին, Աղթամարի Սուրբ խաչ եկեղեցին, Վրաստանի Բոլնիսի շրջանի ադրբեջանաբնակ Դեմիրլի (այժմ՝ Խախալջիվարի) գյուղից 500 մ հարավ-արեւելքում գտնվող՝ 1655 թ. կառուցված հայկական եկեղեցին եւ այլն:

Ադրբեջանի աղվանականացման քաղաքականությանը գումարվեց հայկական որոշ եկեղեցիների ուղղափառացման քաղաքականությունը: Ադրբեջանական պետական քարոզչամեքենան որպես ռուս ուղղափառ եկեղեցի է ներկայացնում Շուշիի Սուրբ Ամենափրկիչ, ինչպես նաեւ՝ որպես աղվանական են ներկայացնում Սուրբ Հովհաննես Մկրտիչ (Կանաչ ժամ) եկեղեցիները:

Հարկ է նշել, որ իսկությունը խեղաթյուրված պատմաճարտարապետական հուշարձաները եւս դառնում են Ադրբեջանի կողմից պետական մակարդակով իրականացվող մշակութային ցեղասպանության զոհ:

Հիմնովին ոչնչացված են Ադրբեջանի պետական քարոզչամեքենայի կողմից որպես աղվանական ներկայացված Ջուղայի խաչքարերը, որի տարածքում զորավարժարան է կառուցվել։ Ծիծեռնավանքի խորանը եւ եզակի շուրֆը պղծվել են, հիմնահատակ ավերել է Հադրութի շրջանի Մոխրենիս գյուղի Սուրբ Սարգիս եկեղեցին, ինչպես նաեւ՝ որպես ռուս ուղղափառ եկեղեցի ներկայացվող Շուշիի Սբ Հովհաննես Մկրտիչ (Կանաչ ժամ) եկեղեցին: Չնայած այն հանգամանքին, որ բազմակի վանդալիզմի թիրախ դառնալուց հետո հիմնովին ավերվեց Շուշիի Սբ Հովհաննես Մկրտիչ եկեղեցին Ադրբեջանի Հանրապետության մշակույթի նախարարության կայքէջում այն ներկայացված է որպես «Օրիորդաց վանք»: Ներկայացվածն ընդամենը մի քանի օրինակ է՝ հազարավոր փաստագրված դեպքերից: