Երևանում տրատիլ պարունակող պայթուցիկ սարքերի հետևանքով մեքենա է հրդեհվել․ ոստիկանությունն անտարբեր ու լուռ է (լուսանկարներ, տեսանյութ)

Ծարավ Աղբյուրի 55/3 շենքի բնակիչներն ահազանգում են՝ հարակից տարածքում հերթական անգամ հնչել են պայթյուններ ու վնասներ հասցրել։ NEWSPRESS.am-ի հետ զրույցում բնակիչներից մեկը նշեց, որ այս տարի արդեն սա երկրորդ անգամն էր։ 

Մինչ այդ պայթյուն է եղել հունվարի 15-ին, որի հետևանքով հրդեհ է բռնկվել․ այրվել է բնակիչներից մեկի մեքենայի դիմացի հատվածը։ 

Զավեշտ է, թե ողբերգություն, բայց դեպքի վայր ժամանած ոստիկանները հանգիստ են նայել կատարվածին․ «Դե սալյուտ է, էլի»,- ասել են նրանք, ձեռքերը թափ տվել ու անվրդով հեռացել։

Այս ամենի մասին ոչ ոք այդպես էլ չի բարձրաձայնել ու ամեն ինչ անցել-գնացել է։

Ոստիկանության անհոգ վերաբերմունքն ու անգործությունը հանգեցրել է նրան, որ պայթյունը կրկնվել է։

«Մարտի 16-ին․ երեկոյան ժամը 22։10-ի սահմաններում պայթյուն լսեցինք։ Ում էինք մի կտոր հաց տվել՝ էս անգամ տուժող չեղավ»,-մեզ հետ զրույցում պատմեց հարակից շենքի բնակիչներից մեկը։

Նրանցից ոմանք եղել են դեպքի վայրում ու լուսանկարել հիշյալ «հրավառության» հետքերը։

Այդ լուսանկարներից մի քանիսը կներկայացնենք ստորև։ Նկարների մեջ երևում է, որ պայթուցիկ սարքերը պատրաստված են տրատիլ տեսակի նյութից, որի պայթյունը բավականին մեծ վտանգ է ներկայացնում և լուրջ հետևանքներ կարող է ունենալ շրջապատի համար։

Եվ անհասկանալի է, թե ոստիկանությունն ինչու հետևողական չէ և ինչու է աչք փակում այս ամենի վրա։

Արմինե Մկրտումյան