Տարոն Մարգարյանը զգում է խաղից դուրս մնալու մոտալուտ վտանգը

«Ես համոզված եմ, որ առաջիկա չորս տարիներին չի լինելու անբարեկարգ բակ: Գոնե երրորդ տարվա վերջին Տարոն Մարգարյանը բարձրաձայն կարող է ասել, որ անխնամ եւ անբարեկարգ բակ այլեւս չկա»։ Սա մեջբերում է նախագահ Սերժ Սարգսյանի խոսքից, երբ նախագահը ներկայացնում էր իր իսկ խոսքով մարդամոտ, համեստ, երևանի խնդիրներով մտահոգ քաղաքապետ Տարոն Մարգարյանին:

Մարգարյանն արդեն մոտենում է պաշտոնավարման երրորդ տարվա ավարտին, սակայն Երևանի խնդիրներով մտահոգ քաղաքապետը այդպես էլ պարզ ճակատով չի կարող կանգնել ու ասել, որ Երևանում այսօր անբերակարգ բակ չկա: Սա իհարկե նվազագույն առաջադրանքն էր, որ տրված էր Մարգարյան Տարոնին, ով ժամանակին ընտրողի վստահությունը շահեց ոչ թե իր ՀՀԿ-ական պատկանելության համար, այլ որ Անդրանիկ Մարգարյանի որդին էր, նույն այն Մարգարյանի, ով 2000թվ-ին, մոտավորապես այս օրերին Քոչարյանի հետ հանդիպման ժամանակ որպես Միասնություն դաշինքի առաջնորդներից մեկը՝ պահանջում էր Սերժ Սարգսյանի հրաժարականը: Տարոն Մարգարյանը այս առումով ավելի հեռատես ու զգուշավոր է, միայն թե վերջին շրջանում նախագահի բնութագրած համեստ Տարոն Մարգարյանը սկսել է ձեռքը խփել սեղանին: Քաղաքապետի հերթական ձեռքխփումը տեղի ունեցավ մարտի 16-ին.« Ինձ համար անընդունելի է, երբ մեր կողմից տրամադրվում է որոշում, բայց երկար ժամանակ տվյալ գույքը պետական գրանցում չի ստանում: Այս հարցում եղեք հետևողական և մինչև վերջ հետևեք գործընթացին»:

Հակապես Տարոն Մարգարյանի վերջին շրջանի իրար հաջորդող խորհրդակցությունները համեմված հախուռն ելույթներով՝ մի տեսակ տպավորություն է ստեղծում, թե Մարգարյան Տարոնը նախընտրական պրոցեսի մեջ է մտել: Իսկ ժամանակից շուտ մտնել նման գործընթացի մեջ, կարող է երկու դեպքում լինել՝ նախ, որ քաղաքապետի պաշտոնի համար Տարոն Մարգարյանը կարող է լուրջ մրցակիցներ տեսնել և զգալ խաղից դուրս մնալու մոտալուտ վտանգը, և երկրորդ տարբերակ, որ Սերժ Սարգսյանը նորց կասի՝ Տարոն սիրուն չի, բայց այս անգամ ոչ թե ինչ-որ պուրակում ինչ-որ տեսք աղճատելու համար, այլ որ քաղաքապետ Մարգարյանն Երևանում խնդիրներ կուտակելով՝ ավելացրել է դժգոհողների թիվը: Իսկ որ բոլոր ընտրություններում հիմնական խաղադրույքը դրվում է Երևանի վրա՝ դժվար թե այս անգամ Մարգարյան Անդրանիկի որդի լինելը օգնի Մարգարյան Տարոնին, քանի որ նա այնքան է սերտաճել իշխանության հետ, որ այսօր խոսում են միայն Տարոնի ու իր շրջապատի օրեցօր ավելացող ունեցվածքի, շենք շինությունների ու կարողությունների մասին: