Եթե Օսկանյանը փոխի իր ազգանունը, դա դեռ չի նշանակում, որ նա Վարդան Օսկանյանը չէ

ԱԺ պատգամավոր Նիկոլ Փաշինյանը, ով Հրազդանի քաղաքապետի թեկնածու Սասուն Միքայելյանի նախընտրական շտաբի ղեկավարն է, նամակով դիմել էր ՀԱԿ խմբակցությանը` խնդրելով Հրազդանի քաղաքապետի ընտրություններում ՀԱԿ վստահված անձանց տեղերը «Քաղաքացիական պայմանագիր» կուսակցությանը տրամադրել: Նիկոլ Փաշինայնն այսօր խորհրդարանում լրագողների հետ զրույցում ընդգծեց, որ խոսքը ՀԱԿ-ի` իր տեղերը զիջելու մասին չէ խոսքը:

«Այդ տեղերը ՀԱԿ-ին չեն պատկանում, որ նրանք զիջեն: Զիջել կարող է «Ժառանգություն» կուսակցությունը, որ ժեստ անի և զիջի, բայց Հայ ազգային կոնգրես կուսակցությունը զիջման խնդիր չունի: Սասուն Միքայելյանը ՀԱԿ խմբակցության ցուցակի 13-րդ հորիզոնականում է: Նրա դերն անուրանալի է Հայ ազգային կոնգրես խմբակցության ձևավորման գործում: Դրանք փաստեր են, որոնք վիճարկման եթակա չեն»,- ասաց Փաշինյանը` դիտարկմանը, թե ՀԱԿ-ի, Սասուն Միքայելյանի և Ձեր հարաբերությունները փոխվել են, ջրեր են հոսել և ճի՞շտ է արդյոք ՀԱԿ-ին այդ հորդորով դիմել, Փաշինյանն արձագանքեց այսպես,- «Օրենսդրությունը չի հոսել: Մենք առաջիկայում այդ օրենսդրության հոսքն էլ կտեսնենք: Ես չեմ խոսում հարաբերությունների մասին, ես խոսում եմ օրենսդրությունից բխող դիրքորոշումների մասին»:

Նա նաև անդրադրաձավ Վարդան Օսկանյանի կողմից կուսակցություն ստեղծելու վերաբերյալ հարցերին, մասնավորպես նրան, որ Վարդան Օսկանյանի ստեղծվելիք կուսակցության օրակարգում է լինելու Մարտի 1-ի բացահայտումը:

«Այսօր ապրիլի մե՞կն է, ինձ թվաց՝ այսօր ապրիլի 1-ն է»,-ասաց Փաշինյանը:

Նրա խոսքով՝ եթե նույնիսկ Վարդան Օսկանյանը փոխի իր անուն ազգանունը, դա չի նշանակում՝ ինքը Վարդան Օսկանյանը չէ, «ով 2008 թվականի Մարտի 1-ին մահվան դատավճիռներ էր հրապարակում Բաղրամյան 26-ում»:

«Երբ ես ասում եմ՝ ոչ ոք և ոչինչ չի մոռացվել, դա չի նշանակում, որ կա՛մ Վարդան Օսկանյանը, կա՛մ Արթուր Բաղդասարյանը, կա՛մ Սերժ Սարգսյանը, կա՛մ Տիգրան Թորոսյանը, կա՛մ Հովիկ Աբրահամյանը, կա՛մ Ռոբերտ Քոչարյանը, կա՛մ Սամվել Ալեքսանյանը, կա՛մ Գագիկ Ծառուկյանը, կամ դաշնակցականները, որևէ մեկը չի մոռացվել, և ես ինքս ինձ համար բացառում եմ որևէ համագործակցության ձև Մարտի 1-ի ոճրագործների և նրանց սպասարկուների հետ: Օսկանյանին ուղիղ դասում եմ և՛ առաջին խմբի մեջ, և՛ երկրորդ խմբի մեջ, և իմ վերաբերմունքն այս առումով չի փոխվել: Ոչ ոք չի մոռացվել ու ոչինչ չի մոռացվել, ու ոչ ոք հույս չունենա, որ ինքն այդ ոչ ոքի մեջ չի մտնելու»,-հայտարարեց Ն. Փաշինյանը: