Վանաձորցին ինձ քվե չի տվել, որ ես գնամ՝ ապօրինություն անեմ. «Հրապարակ»

 «Հրապարակ»-ը գրում է.

Նախօրեին Վանաձորի ավագանին կրկին արտահերթ նիստ է անցկացրել, քվորումի հարցում ՔՊ-ականներին աջակցել են իշխանությունների կողմից քաղաքապետի պաշտոնակատար նշանակված Արկադի Փելեշյանի թիմակիցները, «Մամիկոն Ասլանյան» դաշինքի երկու ճամբարափոխներն ու «Ապրելու երկիր»-ով մանդատ ստացանալուց անմիջապես հետո իշխանության կողմը անղած ավագանու անդամ մի կին։ Հիշեցնենք, որ 2021 թ. դեկտեմբերին Վանաձորում կայացած ընտրություններից օրեր անց` ամենաշատ ձայներ հավաքած «Ասլանյան» դաշինքի առաջնորդ, նախկին քաղաքապետ Մամիկոն Ասլանյանին ձերբակալեցին, ապա կալանավորեցին, իսկ ամիսներ անց Փաշինյանը քաղաքապետի ԺՊ նշանակեց Արկադի Փելեշյանին` հայտնի Ակային, որը գլխավորում էր ընտրությունների արդյունքներով երրորդ տեղը զբաղեցրած ՀԱՍԿ-ի ցուցակը։

Տեւական ժամանակ ավագանու նիստեր չէին գումարվում՝ քվորումի բացակայության պատճառով, սակայն ժամանակի ընթացքում իշխանությունը մարդագողության միջոցով մի քանի ավագանու իր կողմը բերեց, եւ 21 թվականից հետո մի քանի նիստ արեցին` քաղաքի բյուջեն հաստատելու եւ այլ հարցերի համար։

Նախօրեի նիստը սովորականի պես բոյկոտել են «Հայրենիք» կուսակցությունն ու «Ասլանյան» դաշինքի մեծամասնությունը։ Իսկ արտահերթ նիստի օրակարգային հարցը համայնքային բյուջեն է եղել, քաղաքի հատակագիծը եւ այլ հարցեր: Բյուջեն հաստատել են, սակայն ուշագրավ է, որ օրենքը սահմանում է, որ եկող տարվա բյուջեն պետք է հաստատվի տվյալ տարեվերջին, այսինքն՝ նախորդ դեկտեմբերին պետք է նիստ հրավիրվեր, եւ բյուջեն հաստատվեր, որ հունվարից աշխատավարձեր վճարեին: Մինչդեռ աշխատավարձերի վճարումները երեք ամիս կատարվել են, նոր միայն ավագանին հաստատել է տարեկան բյուջեն։

Ավագանու «Հայրենիք» խմբակցության ղեկավար Վահե Դոխոյանը մեզ փոխանցեց բոյկոտի պատճառը․ «Համայնքը համարվում է խոշորացված, եթե ընտրվում է քաղաքապետ։ Մենք մինչ օրս քաղաքապետ չենք ընտրել, մենք չենք ասում՝ պարտադիր ընտրվի Մամիկոն Ասլանյանը, արել եք այսքան բան` մարդ գողացել եք, լավ եք արել, դե քաղաքապետ էլ ընտրեք։ Այլ հարց՝ այդ իրականությունը մեզ դուր կգա, թե ոչ, բայց կունենանք քաղաքապետ: Օրենքի սահմաններում կհաշտվենք իրականության հետ եւ կգանք նիստերին։ Օրինակ, Նիկոլ Փաշինյանն էլ է վարչապետ, բայց այնպես չէ, որ մեր սրտով է, պարզապես այդ դառը իրողության հետ հաշվի ենք նստում։ Եթե կար ժամանակ, որ «Լուսավոր Հայաստանի» բողոքի հիման վրա կար արգելանք՝ քաղաքապետ ընտրելու, հիմա հանվել է, ի՞նչ խնդիր կա` ընտրեք, մենք էլ գանք, մեր դիրքորոշումը հայտնենք»։

Դոխոյանի կարծիքով, իշխանությունը, հավանաբար, վախենում է քաղաքապետի ընտրության օրակարգով նիստ հրավիրել՝ վստահ, որ ավագանին արդեն ազատության մեջ գտնվող Մամիկոն Ասլանյանին կառաջադրի։ «Ինձ ասում են՝ հանուն Վանաձորի գնամ քվեարկեմ, բայց վանաձորցին ինձ քվե չի տվել, որ ես գնամ ապօրինություն անեմ, դրա համար եմ ասում․ եկեք` օրինական ընտրեք քաղաքապետ, մենք էլ գանք, մեր քվեարկությամբ մեր դիրքորոշումը հայտնենք»,- ասաց Դոխոյանը: