ԸՕ-ի շուրջ ՀՀԿ-ում ոչ թե տարաձայնություններ են, այլ տարբեր մոտեցումներ

Հանրապետական կուսակցությունում Ընտրական օրենսգրքի հետ կապված որևէ տարաձայնություն չկա: Այս մասին newspress.am-ին հայտնեց ԱԺ պետաիրավական հարցերի մշտական հանձնաժողովի նախագահ, ՀՀԿ խմբակցության պատգամավոր Հովհաննես Սահակյանը, անդրադառնալով ԸՕ-ի նախագծի հետ կապված՝ ՀՀԿ-ում առաջացած դժգոհությունների և տարաձայնությունների մասին լուրերին:

«Դրանք տարաձայնություններ չեն, այլ տարբեր մոտեցումներ են, որոնք քննարկման արդյունքում ստացել են իրենց պատասխանները: Նման քննարկումներ մշտապես ծավալվում են: Առողջ, կառուցողական քննարկումներ են՝ առանց որևէ խոչընդոտի կամ կաշկանդվածության, որոնց արդյունքում կարող են լինել դեմ և կողմ կարծիքներ»,-ասաց Սահակյանը՝ հավելելով, որ ներկուսակցական քննարկումները շարունակվում են, սակայն նպատակահարմար չգտավ ներկայացնել, թե կոնկրետ ինչ ուղղությամբ են այդ քննարկումներն ընթանում:

Պատգամավորի խոսքով՝ նախագիծը մինչև առաջին ընթերցմանը ներկայացնելը, բոլոր մտահոգությունները տեղ կգտնեն օրինագծում:

Ինչ վերաբերում է ռեյտինգային քվեարկությանն, ապա նրա որակմամբ՝ դրանք ընդամենը խոսակցություններ են:

«Կարծում եմ, եթե ամրագրել ենք 100 տոկոս համամասնական ընտրակարգ, ուրեմն պետք է որևէ մի տարբերակով կարողանանք իրականացնել դա. կան կուսակցական և տարածքային ցուցակներ և այդ մոդելն ենք նախընտրել ու որևէ խնդիր չեմ տեսնում»,-ասաց Հովհաննես Սահակյանը՝ հավելելով, որ այս տարբերակը չի կարելի ամբողջությամբ համարել ռեյտինգային:

Դիտարկմանը, թե ընդդիմադիր գործընկերները հայտարարել են, որ ներկայացվող օրենսգիրքը ավելի վատն է գործող օրենսգրքից իշխանական կուսակցության ներկայացուցիչը պատասխանեց, թե ընդդիմության մոտ վատ սովորույթ է ձևավորվել:

«Քննադատում են առկա դրությունն ու մոտեցումները և շատ շուտ մոռանալով՝ հետո սկսում գովերգել այն: Հիմա ՀԱԿ-ը նշում է, որ լավն էր այն մեկը. եթե լավն էր՝ էն ժամանակ ասեիք, որ լավն էր, մենք էլ չփորձեինք որոշակի փոփոխությունների ենթարկել»,- նշեց պատգամավորը:

Նրա խոսքով՝ ցանկացած օրենք ու մեխանիզմ կյանքի է կոչվում ազգային շահի առկայության դեպքում:

«Նոր ընտրական օրենսգրքի վրա բավականին լուրջ անելիք ունենք: Պետք է կարողանանք ժամանակը ճիշտ օգտագործենք՝ այն կյանքի կոչելու համար: Հակառակ դեպքում՝ հետո ավելի մեծ խնդիրներ կունենանք»,-ասաց պատգամավորը: