Ասլանյանը դատավճիռը դեռ չի ստացել

«Հրապարակ» թերթը գրում է.

Հակակոռուպցիոն դատարանը, դատավոր Սարգիս Դադոյանի նախագահությամբ, հունվարի 29-ին հրապարակեց Վանաձորի նախկին քաղաքապետ Մամիկոն Ասլանյանի գործով մեղադրական դատավճիռը, որով նրան մեղավոր ճանաչեց պաշտոնեական լիազորություններն անցնելու եւ պաշտոնեական կեղծիքի հոդվածներով եւ որպես վերջնական պատիժ՝ նշանակեց ազատազրկումը՝ 4 տարի 4 ամիս ժամկետով, տուգանք՝ 500 հազար դրամ, եւ 3 տարով զրկեց հանրային ծառայության պաշտոններ զբաղեցնելու իրավունքից։ Այսինքն, մոտ 3 տարի ազատազրկում կրած Ասլանյանը դեռ 1 տարի 9 ամիս էլ պետք է նստի, եթե այս դատավճիռն ուժի մեջ մտնի: Ասլանյանը մնաց ազատության մեջ` մինչեւ վերաքննիչ ու վճռաբեկ դատարանները կքննեն գործը, սակայն դատավճիռն ապշեցրեց իր խստությամբ:

Պարզվում է՝ որոշումից ավելի քան մեկ ամիս անց կողմերը դեռ չեն ստացել դատավճիռը։ Ասլանյանի պաշտպան Արտակ Ոսկանյանը մեզ ասաց՝ դատարանում հրապարակվել է դատավճռի եզրափակիչ մասը, ամբողջությամբ այն իրենց դեռ չի տրամադրվել. «Դատարանը պետք է 5-օրյա ժամկետում տրամադրեր, բայց դեռ չենք ստացել։ Այն պետք է բողոքարկվի մեր ստանալուց մեկ ամիս հետո»: Համակարգի մեր աղբյուրն այս դաժան դատավճիռը մեկնաբանեց նրանով, որ դատավարությունը չավարտված՝ դատավորը փոխեց Ասլանյանի խափանման միջոցը` նրան ազատ արձակելով, ինչից հետո, հավանաբար, նրան ճնշել են, եւ նա փորձել է սրանով կոմպենսացնել Ասլանյանին ազատելու իր «համարձակ» որոշումը: