Յուվեցի Կարոն էլ թռավ. խարդախություն խարդախությանց

ԲՀԿ խմբակցության պատգամավոր Կարո Կարապետյանը հունվարի 26-ին սնանկ է ճանաչվել ՀՀ Արարատի և Վայոց Ձորի մարզերի ընդհանուր իրավասության դատարանի վճռով: Պատգամավոր Կարո Կարապետյանի պարտատերերի առաջին ժողովը նշանակվել է մայիսի 12-ին Վեդիի դատարանում:

Հիշեցնենք, որ նախօրեին Արարատի մարզի Քաղցրաշեն համայնքի բնակիչները փակել էին ճանապարհը ի նշան բողոքի, նրանք դժգոհում էին, որ անցած տարի մթերված խաղողի դիմաց մինչև այժմ «Շահումյանի գինու-կոնյակի» գործարանը չի վճարել. գործարանը բնակիչներին պարտք է շուրջ 150 մլն դրամ և 450 ընտանիք մթերման գումար չի ստացել: Գործարանը պատկանում է Կարո Կարապետյանին կամ Յուվեցի Կարոյին:

Նշենք, որ 2015թ-ին խաղող մթերվեց ոչ թե 150 դրամով, ինչպես նախատեսված էր, այլ 40 դրամից սկսած Յուվեցի Կարոյի գինու գործարանը խաղող է մթերել:

Անցած տարի Յուվեցի Կարոն ոչ միայն գրոշներով խաղող մթերեց, խաղողագործներին հուսադրելով, որ ինչ-որ անհայտ ժամանակ կվճարի, այլև որոշել է այդ գումարներն էլ չտալ՝ սնանկ ճանաչվելով:

Իսկ ինչ է լինելու քաղցրաշենցիների վիճակը, ովքեր աշխատել, աշխատել են ու դափ դատարկ նստել: Արդյոք նման ձևով՝ սնանկ ճանաչվելով Յուվեցի Կարոն կխուսափի պատասխանատվությունից:

Թեև նա ամեն ինչ անում էր համոզելու համար, որ գործարանում մթերումներ իրականացրել է ինչ-որ անհայտ Ավետիք և նա հանելուկային ձևով հայտնվել է Քաղցրաշենի գինու գործարանում, իսկ ինքը՝ Կարոն, գործարանի 2015թ-ի մթերման հետ կապ չունի:

Այնպես, որ խարդախություն խարդախությանց:

Նշենք, որ դեռևս անցած տարվանից, երբ մթերումների դիմաց չէին վճարել, քաղցրաշենցիները մտածում էին փող ստանան ու երկրից դուրս գան. Յուվեցի Կարոն նպաստելու է արտագաղթի կանխմանը. քաղցրաշենցիները արտագաղթելու համար փող չեն ունենալու:

Խնդրի առնչությամբ փորձեցինք կապ հաստատել Քաղցրաշենի գյուղապետի հետ, սակայն զանգերը մնացին անպատասխան:

Ի վերջո, Յուվեցի Կարոյի բիզնեսի ո՞ր մասն է սնանկ ճանաչվել և ինչպե՞ս կլուծվի քաղցրաշենցիների խաղողի մթերման դիմաց հատուցման հարցը՝ newspress.am-ը հետամուտ կլինի խնդրին:

Հիշեցնենք, որ նախօրեին հայտարարվել էր, որ քաղցրաշենցիներին կվճարեն մարտի 15-ից մինչև ապրիլի 15-ը: