Սխալ կառուցած տան մեջ կահույք փոխելով փոփոխություններ չես բերի. կառավարման փորձագետ

Newspress.am-ի զրուցակիցն է կառավարման փորձագետ Հարություն Մեսրոբյանը:

– Պարո’ն Մեսրոբյան, Կառավարության կազմում լուրջ փոփոխություններ են տեղի ունենում: Դրանք ի՞նչ հաշվարկի արդյունք են և ՀՅԴ-ականները, նախարարներ նշանակվելով, կարո՞ղ են փոփոխություններ բերել` հաշվի առնելով նաև այն, որ Դաշնկացությունը խոսում է մենաշնորհի վերացման մասին:

– Մարտավարական իմաստով փոփոխությունները բացառված չեն, իսկ ռազմավարական իմաստով` փոփոխությունների չսպասեք: 1991 թվականին սխալ տուն ենք կառուցել, հիմա ներսում կահույք ենք տեղաշարժում: Քանի որ տունը սխալ է կառուցած, հետևաբար, որակական փոփոխություն չի կարող լինել: Ամեն ինչ ավելի քան պարզ է` իշխանական կազմի մեջ մտնում է նոր կուսակցություն: Ավելի լուրջ բան փնտրել պետք չէ:

– Ինչո՞ւ փոփոխությունների պետք չէ սպասել` չե՞ն ցանկանա փոփոխություններ կատարել, թե՞ համակարգային խնդիրներ կան:

Համակարգային խնդիրներ իհարկե կան, առավելևս, որ օլիգարխիկ պետական կառավարման համակարգն ունակ չէ զարգանալու: Ի՞նչ է` կառավարման համակարգի հետ սերտաճած օլիգարխիան ինքն իր դեմ պետք է պայքարի, որպեսզի գերշահույթները՞ վերանան: Եթե ավտոմեքենան փչացած է, ապա չես կարող մրցավազքի մեջ մտնել: Աշխարհի ամենալավ կառավարությունն էլ չի կարող նման պայմաններում որակական փոփոխությունների հասնել:

– Ստացվում է` վիճակը չի փոխվի, մինչև օլիգարխիկ կառավարման համակարգը չփոխե՞ն։

-Այո՛, ոչ մի բարի ցանկություն արդյունք չի տա, լավագույն դեպքում` վիճակը չի վատանա, իսկ լավանալու մասին էլ չենք խոսում: Ի՞նչ է, կարծում եք, որևէ մեկն իշխանության գալով պիտի ասի` «եկել եմ քանդելու»: Բնականաբար ոչ, բայց համակարգային խնդիրների պարագայում խոսքերն ու խոստումները դեռ լուծումներ չեն: