Եկեք ծուռը նստենք, դուզը խոսենք. Խաղաղության պայմանագրում գերիների մասին կետ գրելը պիտի ենթադրի փոխադարձության սկզբունք, իսկ մենք գերի չունենք. ԱԺ նախագահ

Որևիցե մեկի մոտ կասկած թող չլինի, որ որևիցե մի ռազմագերի, որևիցե մի մարդ, որը հիմա Բաքվի դատարան ձևական դատավարության ընթացքում ենթարկվում է դատավարության, ամբաստանյալ է հանդիսանում, մեր համար համարվում է անցանկալի անձ և մենք չենք զբաղվում նրա վերադարձի հարցով: Այս մասին, լրագրողների հետ զրույցում ասաց ԱԺ նախագահ Ալեն Սիմոնյանը:

«Նրանք մեր հայրենակիցներն են և իրենց վերադարձման հետ կապված բոլոր քայլերը արվել են և արվելու են»,-ասաց Ալեն Սիմոնյանը:

Միևնույն ժամանակ նա նկատում է, որ գերիների համարբանակցություններն այդքան էլ հեշտ չէ:

«Ո՞նց եք պատկերացնում, հիմա մենք բանակցություն վարենք, ասենք դատարանի նիստերի դահլիճից իրենց բաց թողեք: Այո, անում ենք դա, բայց ես չեմ հավատում, որ իրենք այդ ամեն ինչը կազմակերպել են, որ կիսատ թողնեն»,-ասաց Ալեն Սիմոնյանը:

Անդրադառնալով քննադատություններին, որ իշխանությունները գերիների վերադարձի հարցն առանձնացրել են խաղաղության պայմանագրից, ԱԺ նախագահն ասաց. «Իսկ ո՞վ ասեց, որ խաղաղության պայմանագրի մեջ պետք է նման կետ լիներ: Էլ չեմ ասում, ով ասեց, որ նման կետ կար և դա դուրս է հանվել հայկական կողմից: Իսկ ո՞վ ասեց, որ եթե նոյեմբերի 9-ի հայտարարությամբ, որտեղ որ կա երեք երկրի ղեկավարի ստորագրություն, այդ թվում ՌԴ նախագահի ստորագրությունը, որտեղ ասվում է, որ բոլոր պահվող անձինք պետք է վերադարձվեն, Ադրբեջանը այդ կետը չի կատարել, հիմա մենք պետք է խաղաղության պայմանագրում պայման դնենք և ինքը այդ կետը կկատարի»,- ասաց Ալեն Սիմոնյանը։

Նրա խոսքով, Ադրբեջանը այդ լծակը օգտագործել է և շարունակել է օգտագործել քաղաքական առևտուր անելու համար, ինչը արվեց COP29-ի ժամանակ։ Ինքը դա չի անելու:

«Եկեք, ժողովրդական լեզվով ասած, ծուռը նստենք, դուզը խոսենք։ Կարելի է անընդհատ մանիֆեստային և կենացային և լավը թվալու համար տեսախցիկների առաջ ասել բացարձակ ճշմարտություններ, բայց դրանք գործնականում բան չունեն»,- ասաց ԱԺ նախագահը:

Նա նշեց նաև, որ խաղաղության պայմանագրի մեջ դա գրելը պիտի ենթադրի նաև փոխադարձության սկզբունք:

«Մենք գերի չունենք այս պահին, որ փոխադարձությամբ հետ տանք:  Հետո խաղաղության պայմանագիրը կնքում ես ու գերիներին պահո՞ւմ ես: Ես կարծում եմ, որ դա անհամատեղ է»,- ասաց Ալեն ՍԻմոնյանը։