Փարաքարի նախկին ղեկավար Դավիթ Մինասյանը կմասնակցի Փարաքարի ընտրություններին․ նրա նկատմամբ քրգործը դադարեցվել է օրերս

Փարաքարի նախկին համայնքապետ Դավիթ Մինասյանը, որի նկատմամբ օրերս դադարեցվել էր քրեական հետապնդումը, պատրաստվում է մասնակցել Փարաքարում նշանակված ընտրություններին։ Այս մտադրության մասին Մինասյանը հայտնել է ֆեյսբուքյան իր էջում:

«ՀՀ Արմավիրի մարզի Փարաքար համայնքի Փարաքար, Թաիրով, Մերձավան, Նորակերտ, Մուսալեռ, Պտղունք, Արևաշատ, Այգեկ և Բաղրամյան գյուղերի հարգելի բնակիչներ,

Սիրելի՛ բարեկամներ,

Շատերիդ է հայտնի, որ 2019 թվականի սեպտեմբերի 29-ից Փարաքար համայնքում տեղի ունեցած համայնքի ղեկավարի ընտրության քվեարկության արդյունքներով ստանձնել եմ համայնքի ղեկավարի պաշտոնը, ապա, համայնքների խոշորացումից հետո, ավագանու կողմից ևս ընտրվել եմ խոշորացված համայնքի ղեկավար և մինչև 2024 թվականի մայիս ամիսը պատվով և արժանապատվորեն կատարել եմ իմ պարտականությունները։

Բոլորիդ է հայտնի, որ շուրջ 5 տարի անձնվիրաբար ծառայել եմ համայնքին, իմ ուշադրության կենտրոնում պահելով ինչպես համայնքի խնդիրները, այնպես էլ համայնքի բնակիչներից յուրաքանչյուրի հոգսն ու խնդիրը դարձնելով իմ անձնականը։

Այսինքն, Ձեզանից յուրաքանչյուրն արդեն իսկ տեսել ու զգացել է իմ անվերապահ նվիրումը համայնքին և համայնքի խնդիրներին, դրանց լուծմանն ուղղված հետևողական զարգացումներին, որոնք կիրառվել են համաչափորեն՝ բոլոր 9-ը բնակավայրերի նկատմամբ միատեսակ ու հավասարաչափ մոտեցմամբ։

Խոշորացված համայնքի զարգացման տեսլականն իմ մեջ արմատավորվել է ոչ թե տեսական և պոպուլիստական խոսքերով, այլ շուրջ 5 տարի օր ու գիշեր ապրելով համայնքի խնդիրներով, իմ մեջ ուրվագծվել է խոշորացված համայնքի զարգացման առավել արդյունավետ և իրատեսական ծրագրերի մի մեծ համախումբ, որը Ձեր աջակցությամբ և բարձր վստահությամբ պատրաստ եմ պատվախնդրորեն կյանքի կոչելու։

Փարաքար համայնքի Փարաքար, Թաիրով, Մերձավան, Նորակերտ, Մուսալեռ, Պտղունք, Արևաշատ, Այգեկ և Բաղրամյան գյուղերի հարգելի բնակիչներ․

Շատ անգամներ եմ ասել, որ խոշորացումից և միավորվելուց հետո մենք ապրելու ենք ինը գյուղ մեկ համայնք սկզբունքով, որը և ապացուցվել է անցնող երեք տարվա կառավարման շրջանում։

Անցնող ժամանակաշրջանում միավորված համայնքի կառավարումն իրականացնելով, արդեն իսկ համատեղ ու հավասար համակեցության, արդար կառավարման դրական փորձ ունենք կուտակած, որն իհարկե ամեն օր կատարելագործման և ավելի լավը դարձնելու մեծ ձգտումով ու պատասխանատվությամբ եմ կայացրել կրկին առաջադրվելու իմ որոշումը, որը բխում է նաև խոշորացված համայնքի բնակչության լայն շրջանի անկեղծ քաջալերումից և անցնող ժամանակաշրջանի մեր գործունեությանը տված բարձր գնահատականից։

Բոլորիս է հայտնի, որ հետպատերազմյան շրջանում ապրում ենք դժվար ժամանակներ, որից անմասն չէ նաև մեր խոշորացված համայնքը։

Մենք պարտքի խորը զգացում ունենք նաև մեր համայնքի անմահացած հերոսների առաջ, ովքեր իրենց կյանքը տվեցին՝ հանուն մեր արժանապատվության և բարեկեցության, ուստի և մեր ամեն քայլը պետք է խարսխվի պատասխանատվության բարձր զգացումով՝ հանուն մեր վաղվա օրվա։

Ես լավատես եմ ու վստահ, որ մեր կուտակած փորձով, գիտելիքներով և համախմբումով կշարունակենք մեծ ծրագրեր իրականացնել մեր համայնքի բոլոր բնակավայրերում։

Ես չեմ ցանկանում մանրամասն և հատ առ հատ նշել այն ծրագրերը, որոնք իրականացվել են իմ ղեկավարման տարիներին, քանզի դրանք բոլորիդ աչքի առաջ են եղել և յուրաքանչյուրդ ինչ-որ առումով ականատեսն ու շահառուն եք եղել մեր սկսած ծրագրերի, որոնք միայն սկզիբն են եղել։

Այժմ նորից Ձեր վստահությունը ստանալով, էլ ավելի մեծ ծրագրեր կյանքի կկոչենք և Ձեր կյանքը քայլ առ քայլ կդարձնենք ավելի բարեկեցիկ։

Այսպիսով, հարգելի բնակիչներ, դիմում եմ ձեզ, հայտարարելով, որ Փարաքար միավորված համայնքի ավագանու արտահերթ ընտրություններում «Ազգային առաջընթաց» կուսակցության կողմից, որպես Փարաքար միավորված համայնքի ղեկավարի թեկնածու, մասնակցելու եմ 2025 թվականի մարտի 30-ին կայանալիք ընտրություններին՝ ակնկալելով Ձեր աջակցությունը և վստահությունը՝ հանուն մեր միավորված համայնքի՝ Փարաքարի կայուն և իրատեսական զարգացմանը։

Առաջադրումս արդարացված է նշված բարեփոխիչ քաղաքական ուժի կողմից, քանի որ «Ազգային առաջընթաց» կուսակցության կարգախոսով միանում ենք Նոր Հայաստանի կերտմանը՝ հանդիսանալով նրա անբաժանելի մասնիկը։

«Ազգային առաջընթաց» կուսակցության աջակցությամբ մեր համայնքում հիմք կդրվի և կձևավորվի այնպիսի բարենպաստ իրավաքաղաքական միջավայր, որի արդյունքում ՄԵՆՔ՝ ՓԱՐԱՔԱՐ ՀԱՄԱՅՆՔԻ ԲՆԱԿԻՉՆԵՐՈՎ ի վիճակի կլինենք լիարժեք իրացնել մեր քաղաքացիական ու քաղաքական իրավունքներն ու ազատությունները։

Մենք նաև կկերտենք Հայոց պետականության աննախադեպ առաջընթացը՝ հիմնված ազգային առաջնահերթությունների վրա»,- գրել է նա: