ԸՕ նախնական եզրակացությունը Վենետիկի հանձնաժողովը կներկայացնի մինչև հունիս

ՀՀ սահմանադրական դատարանի նախագահ, Եվրոպայի խորհրդի Վենետիկի հանձնաժողովի բյուրոյի անդամ Գագիկ Հարությունյանը մասնակցել է Վենետիկի հանձնաժողովի բյուրոյի նիստին, որում քննարկվել են Հանձնաժողովի 106-րդ լիագումար նիստի օրակարգին ու աշխատանքների կազմակերպմանն առնչվող հիմնահարցեր:

ՍԴ մամուլի ծառայությունից հայտնում են, որ Վենետիկի հանձնաժողովի 106-րդ լիագումար նիստի շրջանակներում քսանից ավելի օրակարգային հարցերից առանցքային քննարկման առարկա էին Լեհաստանի Սահմանադրական տրիբունալին առնչվող ու Ռուսաստանի Դաշնության «Սահմանադրական դատարանի մասին» օրենքում փոփոխություններ կատարելու վերաբերյալ հարցերը: Առանձնահատուկ նշանակություն տրվեց իրավունքի գերակայության հիմնական չափորոշիչների ցանկի վերաբերյալ զեկույցի հաստատման հարցին:

Վենետիկի հանձնաժողովի լիագումար նիստն անդրադարձել է նաև Հայաստանի Հանրապետության նոր ընտրական օրենսգրքի նախագծի վերաբերյալ համապատասխան եզրակացության նախապատրաստման խնդրին:

Հանձնաժողովի անդամ պրն Եվգենի Տանչևը հայտնել է, որ Հայաստանի Հանրապետությունը հայցել է Վենետիկի հանձնաժողովի կարծիքը ՀՀ նոր ընտրական օրենսգրքի նախագծի վերաբերյալ: Հաշվի առնելով, որ Հանձնաժողովի հաջորդ նիստը տեղի կունենա հունիսի սկզբին, սույն հարցով զեկուցողների անունից հայցել է Հանձնաժողովի թույլատվությունը` նախնական եզրակացությունը ներկայացնել մինչև հունիսյան լիագումար նիստը, ինչն արժանացավ հանձնաժողովի հավանությանը:

Հանձնաժողովի 106-րդ լիագումար նիստի օրակարգային հարցերի շրջանակներում ընդգրկված էր նաև «Սահմանադրական մշտադիտարկման վերաբերյալ» հարցը: Այդ հարցով հաղորդմամբ հանդես է եկել ՀՀ սահմանադրական դատարանի նախագահ պրն Գ. Հարությունյանը:

Անդրադառնալով սահմանադրական մշտադիտարկման համակարգի կարևորությանը, ներկայացնելով վերջերս լույս տեսած «Սահմանադրական մշտադիտարկում» մենագրության մեջ ամփոփված իր հետազոտության արդյունքները, անդրադառնալով սահմանադրական մշտադիտարկման չափորոշիչներին, մասնավորապես` ներկայացնելով կոռուպցիայի աճի հարցում ամբողջ աշխարհում տիրող ներկա մտահոգիչ իրավիճակը, կարևորելով իրավունքի գերակայության ապահովման հարցում սահմանադրական մշտադիտարկման առանցքային նշանակությունը` պրն Գ. Հարությունյանը հանդես է եկել սահմանադրական մշտադիտարկմանը նվիրված համաեվրոպական խորհրդաժողով հրավիրելու նախաձեռնությամբ:

Պրն Գ. Հարությունյանը նշել է նաև, որ նման միջոցառում կազմակերպելու առնչությամբ հանդիպումներ ու քննարկումներ է ունեցել նաև Եվրոպայի խորհրդի գլխավոր քարտուղար պրն Թ. Յագլանդի, Մարդու իրավունքների եվրոպական դատարանի նախագահ պրն Գ. Ռայմոնդիի, Վենետիկի հանձնաժողովի նախագահ պրն Ջ. Բուքիքիոյի հետ, ովքեր կարևորում են նման խորհրդաժողովի հրավիրումը:

Վենետիկի հանձնաժողովի անդամ պրն Ք. Գրաբենվարտերն, իր ելույթում անդրադառնալով պրն Գ. Հարությունյանի առաջարկությանը, ընդգծելով նման նախաձեռնության կարևորությունը` արտահայտվել է հօգուտ սահմանադրական մշտադիտարկմանը նվիրված համաեվրոպական խորհրդաժողովի անցկացմանը և կարևորել Վենետիկի հանձնաժողովի շրջանակներում տվյալ հարցին առավել հետևողական մոտեցման ցուցաբերումը:

Վենետիկի հանձնաժողովը, կարևորելով հիմնախնդիրը, առաջարկել է պրն Գ. Հարությունյանին` հաշվի առնելով Վենետիկի հանձնաժողովի կողմից ընդունված «Իրավունքի գերակայության չափորոշչային ցանկը», նախապատրաստել տվյալ միջոցառման կազմակերպման հայեցակարգային մոտեցումները, առաջարկել դրա անցկացման ձևաչափը, վայրը և ժամկետները և դրանք ներկայացնել հանձնաժողովի հունիսյան լիագումար նիստին: