ԱՄՆ դեսպանատանը հաճո չէ՞ Հայաստանի ՏՏ ոլորտի զարգացումը

Արդեն երկու տարի է բարձր տեխնոլոգիաների ոլորտը դժգոհում է Հայաստանում ԱՄՆ դեսպանատան կողմից վիզաների տրամադրման առումով առկա խնդիրներից:

Ոլորտի պատասխանատուները քանիցս բարձրացրել են այս հարցը, որ ոլորտի աշխատակիցները դժվարությամբ են ստանում ԱՄՆ վիզա, կամ էլ մերժվում են՝ անհիմն պատճառաբանություններով:

ԱՄՆ դեսպանատնից նշում են, որ անհրաժեշտ է շատ դեպքերում ձևակերպել աշխատանքային վիզա, որն, ըստ ոլորտի պատասխանատուների, նախ անիմաստ է ու թանկ, ապա այս դեպքերը փոքր տոկոս են կազմում ընդհանուր մերժումների վիճակագրության մեջ։

Որպես կանոն, ոլորտի մասնագետները ԱՄՆ են մեկնում որևէ միջոցառման մասնակցելու, կամ հանդիպումների ու ներկայացումների: Հաճախ է լինում, որ ԱՄՆ դեսպանը մասնակցում է ՏՏ ոլորտի միջոցառումներին, հանդիպում ոլորտի ներկայացուցիչների հետ: Սպասելի է, որ նման հետաքրքրություն ունենալով՝ դեսպանատունը պետք է, որ ավելի տրամադրված լիներ չխոչընդոտելու ոլորտի զարգացմանը, սակայն, ինչպես ցույց է տվել երկու տարվա ընթացքը, ԱՄՆ դեսպանատան վիզաների տրամադրումը ոչ միայն չի բարելավել, այլև վատացել է:

Newspress.am-ին Ինֆորմացիոն տեխնոլոգիաների ձեռնարկությունների միության փոխտնօրեն Հայկ Չոբանյանը նշեց, որ խնդրի առնչությամբ հանդիպել են ԱՄՆ դեսպանատան ներկայացուցիչների հետ՝ խնդիրը կարգավորելու համար, քանի որ մերժումները հաճախ սուբյեկտիվ են լինում:

«Առաջակվել է ավելի հեշտ պրոցեդուրա կիրառել: Հայաստանի ՏՏ ոլորտը կապված է ամերիկյան շուկայի հետ և փոխայցելություններն անընդհատ են: Հայաստանի ՏՏ ոլորտի շուրջ 40 տոկոսն ունի ամերիկյան ներկայություն, իսկ արտահանումների ավելի քան 60 տոկոսը զբաղեցնում է ԱՄՆ-ն»,- ասաց նա:

Հ. Չոբանյանը նաև նշեց, որ անհիմն պատճառաբանություններով մերժումները լուրջ խոչընդոտ են ոլորտի զարգացման համար, որը մի կողմից վտանգում է ԱՄՆ գործընկերների հետ հարաբերություններին, մյուս կողմից լավ հնարավորություն է մրցակիցների համար՝ զբաղեցնելու հայկական ընկերությունների տեղը:

«Ոլորտը զգալի կորուստներ է կրում ԱՄՆ դեսպանատան այս վարքագծի պատճառով: Այդ առումով մեր բողոքն ենք հայտնում և հայտարարում, որ այս վերաբերմունքը ուղղակիորեն հարվածում է ՀՀ տնտեսությանն ու ապագային: Պետք է անհապաղ քայլեր ձեռնարկել վիճակը շտկելու համար»,- ասաց նա, հավելելով, որ ԱՄՆ դեսպանատան նման վերաբերմունքը ոլորտի համար անհասկանալի է:

Եթե պատճառ լիներ, վստահեցրեց, որ լուծումը գտած կլինեին, սակայն որևէ պատճառ չկա ԱՄՆ դեսպանատան նման վերաբերմունքի համար: