Սասուն Խաչատրյանը Դանիել Իոաննիսյանի մոտ բարեխոսե՞լ է Կարեն Բատիկյանի համար. կողմերի պարզաբանումը

Հակակոռուպցիոն կոմիտեի ղեկավարի ընտրության թեման գնալով թեժանում է: NEWSPRESS.am-ն անդրադարձել էր ՀԿԿ նախագահի 5 թեկնածուներից մեկին՝ Քննչական կոմիտեի նախագահի տեղակալ Արթուր Նահապետյանին։ Մասնավորապես, գրել էինք, որ Քննչական կոմիտեի նախկին նախագահ Արգիշտի Քյարամյանը հանդիպել էր Դանիել Իոաննիսյանի հետ՝ խոսելու ՔԿ նախագահի տեղակալի մասին։

Մեկ այլ աղբյուրի համաձայն էլ` Հակակոռուպցիոն կոմիտեի նախկին ղեկավար Սասուն Խաչատրյանն է փորձում «քավորություն» անել թեկնածուներից Կարեն Բատիկյանի համար։

Խոսքը նախկինում դատախազությունում աշխատած, հետագայում գրեթե բոլոր գործազուրկ իրավապահների օրինակով փաստաբան դարձած Կարեն Բատիկյանի մասին է:

Վերջինս հանրային կյանքում առանձնապես աչքի չի ընկել։ NEWSPRESS.am-ի տեղեկություններով, վերջին տարիներին հաճախ է լինում Միացյալ Նահանգներում, որտեղ բնակվում է նրա դուստրը։ Մեր ամերիկյան աղբյուրները նշում են, որ վերջերս նա դստեր համար շքեղ նվերներ է գնել՝ առանձնատուն և թանկարժեք ավտոմեքենա:

Ըստ մեր ստացած լուրերի` Բատիկյանն ԱՄՆ-ում սերտ կապի մեջ է եղել Արման Գևորգյանի` «Ծիծակ» մականունը կրող մի տղամարդու հետ, ով վերջերս հայտնվել էր ամերիկացի իրավապահների ուշադրության կենտրոնում և մեղադրվում էր մաքսանենգ ճանապարհով ԱՄՆ-ից Երևան թանկարժեք մեքենաներ ներմուծելու մեջ։

Մենք փորձեցինք կապ հաստատել Կարեն Բատիկյանի հետ և նրանից ճշտել տեղեկությունը։

«Ծիծակ» մականունը Կարեն Բատիկյանին ծանոթ չէր։ Համենայնդեպս, մեզ հետ զրույցում, նա ասաց, որ նման անունով մարդու չի ճանաչում։

«Չգիտեմ՝ ով է նման ինֆորմացիա տարածում։ Նույնիսկ ծիծաղս է գալիս, որովհետև ես ոչ «Ծիծակ» եմ ճանաչում, ոչ Սիսակ։ Չունեմ ընդհանրապես նման անձնավորություն իմ շրջապատում, չեմ էլ ունեցել և լսել, ոչ էլ խարդախությունների հետ եմ առնչվում, ընդհակառակը՝ միշտ խարդախությունների դեմ եմ պայքարել»,- ասաց Կարեն Բատիկյանը։

Ինչ վերաբերում է իր դստեր համար շքեղ նվերներ՝ առանձնատուն և թանկարժեք ավտոմեքենա գնելու հարցին, ապա Կարեն Բատիկյանը հերքեց՝ իր դստերը շքեղ նվերներ չի նվիրել։

«Դուստրս, որ լսի՝ երևի շատ կուրախանա։ Իմ դուստրն ԱՄՆ-ում սովորում է՝ փաստաբան դառնա, մեր ընտանիքում բոլորս իրավաբաններ ենք»,- ասաց նա։

Կարեն Բատիկյանը հերքեց նաև այն տեղեկությունը, թե իր համար Սասուն Խաչատրյանն է փորձում «քավորություն» անել։ Նրա որակմամբ, տեղեկություններից ոչ մեկն արժանահավատ չէր։

«Այս ամենը զվարճալի անեկդոտի նման է՝ ո՛չ «Ծիծակ» եմ ճանաչում, ո՛չ առանձնատուն եմ գնել շքեղ, ո՛չ Սասուն Խաչատրյանն է ինձ համար միջնորդել։ Սա մրցույթ է, ինչպե՞ս կարող է միջնորդել»,- ասաց նա։

NEWSPRESS.am-ը կապ հաստատեց նաև Հակակոռուպցիոն կոմիտեի նախագահի թեկնածուների ընտրության համար ձևավորված խորհրդի անդամ Դանիել Իոաննիսյանի հետ։ Նա նշեց, որ Սասուն Խաչատրյանին վաղուց չի հանդիպել։

Ինչ վերաբերում է հարցին, թե ծանո՞թ է արդյոք տեղեկություններին, ըստ որոնց Կարեն Բատիկյանի անունը կապում են ԱՄՆ-ում գտնվող հայազգի մի տղամարդու հետ, ով վերջերս հայտնվել էր ամերիկացի իրավապահների ուշադրության կենտրոնում, հաշվի առնելով, որ Իոաննիսյանը մշտապես պնդում է, թե մանրամասն ուսումնասիրում է թեկնածուների կենսագրության «մութ» դրվագները, նա պատասխանեց, որ տեղեկություններ հավաքում են բոլոր թեկնածուների մասին, բայց մինչև նրանց հետ հարցազրույցի օրը չեն հրապարկում, ինչ-որ առումով նաև փակ են պահում, թե որ թեկնածուի մասին ինչ տեղեկություն ունեն։

 «Ես, մինչև հարցազրույցը, ցավոք սրտի, չեմ կարող ասել, թե ում մասին ինչ տեղեկություն ունենք․ կարող է` ունենք, կարող է՝ ոչ, կարող է ունենք, բայց այդ տեղեկատվության վրա վստահ չենք, բայց դուք այդ տեղեկատվությունը փոխանցում եք լսրարանին»,- ասաց նա։

Իոաննիսյանը բոլորին հորդորում է իրենց փոխանցել ցանկացած տեղեկություն թեկնածուների մասին՝ հեռակապով, հանդիպման միջոցով, կամ ինչպես կցանկանան։

«Ամեն ինչ չի, որ հալած յուղի տեղ պետք է ընդունենք․ պարզ է, չէ՞, որ այդ տեղեկությունները պետք է ուսումնասիրվեն։ Բայց շնորհակալ կլինեմ բոլորին, ովքեր թեկնածուների մասին տեղեկություն հրապարակեն կամ մեզ փոխանցեն։ Երկու դեպքում էլ օգտակար կլինեն»,- ասաց Իոաննիսյանը։

Արմինե Մկրտումյան