Զելենսկին չգիտի, թե որտեղ է մեր տված գումարի կեսը․ Դոնալդ Թրամփը մանրամասներ է հայտնել ռուս-ամերիկյան բանակցություններից

ԱՄՆ նախագահ Դոնալդ Թրամփը ելույթ է ունեցել Սպիտակ տանը և մեկնաբանել Մոսկվայի և Վաշինգտոնի բանակցությունները։ Ինչպես նշել է ամերիկացի առաջնորդը, Էր-Ռիադում ԱՄՆ-Ռուսաստան բանակցություններից հետո նա շատ ավելի վստահ է դարձել ուկրաինական հակամարտությունը լուծելու համար գործարքի կայացման հարցում։

Թրամփն ասել է, որ հիասթափված է Ուկրաինայի հարցով Ռուսաստանի և ԱՄՆ-ի միջև բանակցությունների հետ կապված Կիևի դժգոհությունից։ Ինչպես նշել է ԱՄՆ նախագահը, մի քանի տարի առաջ Ուկրաինայի պատերազմը կարող էր դադարեցվել առանց տարածքային կորուստների։

Նա նաև նշել է, որ Ուկրաինային անհրաժեշտ են ընտրություններ, եթե նա ցանկանում է տեղ ունենալ բանակցային սեղանի շուրջ, իսկ Զելենսկին ժողովրդի կողմից միայն 4% վարկանիշ ունի։

Թրամփը նշել է, որ Ռուսաստանն ի վիճակի է շատ արագ ոչնչացնել ուկրաինական քաղաքների 100%-ը, այդ թվում՝ Կիևը, բայց չի ցանկանում դա անել։ Բացի այդ, Թրամփը հայտարարել է, որ ուկրաինական կողմը պետք է բացատրի, թե ուր է ուղարկվել ԱՄՆ-ի ֆինանսական օգնությունը կամ վերադարձնի ԱՄՆ-ին այդ միջոցները։

«Զելենսկին ասաց, որ չգիտի, թե որտեղ է մեր տված գումարի կեսը։ Մենք նրանց, կարծում եմ, 350 միլիարդ դոլար ենք տվել», - ասել է ամերիկացի առաջնորդը և հայտարարել է, որ ԱՄՆ-ը դեմ չէ եվրոպական զորքերի Ուկրաինա մտցնելուն, սակայն այնտեղ ամերիկյան զորքեր չեն լինի։