«Հնարավոր է, որ կոալիցիա չկազմեն, և ընտրությունը մտնի փակուղի». «Իրավունք»

«Իրավունք» թերթը գրում է.

«Գյումրիում որևէ  լարվածություն չկա, կրիմինալ մի փնտրեք Գյումրիում, եթե լարվածություն լինի, ապա իմացեք, որ դա կարող են սադրել բացառապես այսօրվա իշխանությունները, -անդրադառնալով Գյումրիում առկա նախընտրական մթնոլորտին ասաց Շիրակի թեմի առաջնորդ Միքայել արքեպիսկոպոս Աջապահյանը։

-Սրբազան, այսինքն բացառո՞ւմ եք, որ ընդդիմության երկու թևերի միջև  բախում լինի։

-Բայց ով ասաց, որ ընդդիմությունը երկու թև է, ընդդիմությունը բազմաթիվ թևեր է։

-Ասում են, որ հիմնական պայքարը ընթանալու է Մարտուն Գրիգորյանի և նախկին քաղաքապետ Վարդան Ղուկասյանի միջև։

-Իրենց անունները շատ է հնչում, որովհետև իրենք տեսանելի դեմքեր են եղել, մյուսները նոր դեմքեր են, բայց էլի ընդդիմություն են։

-Լավ, ըստ Ձեզ, ո՞վ կհաղթի։

-Որևէ  մեկը չի հաղթի, կուալիցիայի անհրաժեշտություն կլինի, ավելին՝ հնարավոր է, որ կոալիցիա չկազմեն և ընտրությունը մտնի փակուղի։

-Այսինքն որևէ մեկին չի՞ հաջողվի բացարձակ վստահության քվեի արժանանալ։

-Անհնարին է, իհարկե չի կարող։

-Լավ, իսկ հայտնի առաջադրված անձանցից ով ինչ շանսեր ունի։

-Գրեթե հավասար են, օրինակ Վարդան Ղուկասյանն էլ, Մարտուն Գրիգորյանն էլ իրենց կայուն ընտրազանգվածն ունեն, բայց մեծամասնություն չեն կազմի, բացառված է։ Ես կրկնում եմ Գյումրիում այս պահին կրիմինալի ակտիվացում չկա, դա փափագում է իշխանությունը, որպեսզի պղտոր ջրում ձուկ որսա և հասնի հաջողության։ Ուզում են ժողովրդին քրեական աշխարհով վախեցնել, որ հասնեն հաջողության։

-Բայց այդ մտավախությունը անտեղի չի, չէ՞, հիշենք Գյումրիի ընտրությունները․․․

- Հա եղել են լարված ընտրապայքարներ, իրար նկատմամբ ոչ պատշաճ որակումներ են հնչել, բայց քրեական ռեզերվ այստեղ գործ չի ունեցել։

-Սրբազան, բացառո՞ւմ եք, որ նախկին քաղաքապետ Վարդան Ղուկասյանը իրեն վստահված ձայներով հետագայում կոալիցիա կազմի ՔՊ-ի հետ։

-Հավանական չեմ համարում, ես այն մարդկանից եմ, որ երբեք չեմ ասում երբեք, բայց հավանական չեմ համարում։

-Ռուբեն Մխիթարյանը ևս առաջադրվել է, ինչի կապակցությամբ ՔՊ-ական պատգամավոր Պալյաննը նշել է , որ վերջինս կապվում է սրբազանների հետ։

- Ինձ հետ բոլոր թեկնածուներն էլ առնչություն ունեն, բոլորին ճանաչում եմ, բոլորի հետ էլ շատ լավ հարաբերությունների մեջ եմ, այսքանը։ Ավելին` Սարիկ Մինասյանի հետ էլ շատ լավ հարաբերությունների մեջ եմ։

-Ինչպե՞ս եք գնահատում Մինասյանի շանսերը։

-Մինասյանի շանսերն իշխանության շանսերն են, այո՛, ինքն իր ձայներն ունի, բայց հիմնականում իշխանությանը սատարողներն են ընտրելու Սարիկ Մինասյանին»:

Մանրամասները` թերթի այսօրվա համարում