Ո՞ւր է հիմա Շառլ Միշելը, աու՜․ Եվրոպայի առաջնորդների կալիբրը փոխվել է․ անորոշությունների ֆոնին պետք է պահել ԵԱՀԿ Մինսկի խմբի ֆորմատը․ Քոչարյան

Մենք ակտիվ փոփոխվող աշխարհի հետ գործ ունենք, ոչ ոք հստակ չի կարող ասել, թե ինչ է լինելու, բայց ուղղությունը հասկանալի է և այս ընթացքում քայլեր անել, որոնք անվերադարձ կորուստ են բերելու բանակցային գործընթացին, հիմարություն է, ամեն գնով պետք է պահել ԵԱՀԿ Մինսկի խումբը, հայտարարեց Երկրորդ նախագահ Ռոբերտ Քոչարյանը։

Նրա խոսքով՝ եթե հիմա Մինսկի խումբը լուծարվի, այլևս չափազանց դժվար կլինի այդ կարգի նոր ֆորմատ ունենալ.

«Այսօրվա վիճակով Մինսկի խումբը քեզ ինչո՞վ է խանգարում։ Խումբը ստեղծվել է, բանակցային ֆորմատ է, թող մնա։ Երբ ստեղծվի այլ կարգի բանակցային աշխատող ֆորմատ, նոր այդ ժամանակ սա լուծարեք։ Արդեն այդ հարվածներից ոչ թե իրենց ճակատն է «մազոլ» դարձել, այլ՝ երկրի։ Խաղաղապահները սկզբնական շրջանում իրենց առաքելությունը լավ էին անում, այնքան ժամանակ, մինչև մենք չենք ասել, որ Արցախը ճանաչում ենք Ադրբեջանի կազմում։

Այդ ժամանակվանից էլ սկսում են խնդիրները։ Ի՞նչն էր քեզ ստիպում, որ այդ պահին գնաս Պրահա և այդ թուղթը ստորագրես, որ Շառլ Միշելն ասի՞՝ էս ինչ լավ տղա է։ Ո՞ւր է հիմա Շառլ Միշելը, աու՜։ Դուք չեք տեսնո՞ւմ, որ այսօր Եվրոպայի առաջնորդների կալիբրն ա փոխվել։ Այդ մարդիկ պաշտոնից հեռանալուց հետո կորում, անհետանում են։ Փոխվել է ամեն ինչ»։

Քոչարյանը պնդեց՝ հատկապես այսօրվա անորոշությունների ֆոնին պետք է պահել ԵԱՀԿ մինսկի խմբի ֆորմատը։