Պատերազմը զսպող որևէ մեխանիզմ չկա․ խաղաղության խաչմերուկ չի՝ տուպիկ է. Ռոբերտ Քոչարյան

Տեսականորեն, իհարկե, կարող ենք հասնել խաղաղության, բայց այն ֆորմատով, որով այսօր են բանակցում, խաղաղություն չէ. հրավիրված ասուլիսին հայտարարեց ՀՀ երկրորդ նախագահ Ռոբերտ Քոչարյանը՝ անդրադառնալով ՀՀ կառավարության առաջարկած Խաղաղության խաչմերուկ փաստաթուղթը կյանքի կոչելու հնարավորություններին։

 «Ամենից մեծ խնդիրներից մեկն այն է, որ դու Ադրբեջանի հետ բանակցում ես առանց միջնորդի, ըստ էության, այդ փաստաթղթերը երաշխավորող որևէ պետություն կամ պետությունների միավոր չի լինելու։ Ընդհանրապես որևէ թուղթ չի զսպելու որևէ պատերազմ»,- ասաց նա։  

Ըստ Քոչարյանի՝ պատերազմն իրականում զսպելու համար պետք են բանակցություններ, ստորագրված փաստաթղթեր և պետք են երաշխավորներ։ «Հատկապես այսօր մենք հավասար պայմաններում չենք. ամենից լավ երաշխավորը՝ եթե դու ունես այնպիսի բանակ և այնպիսի հնարավորություններ, որ ինքն արդեն երաշխավորում է գոնե մի զգալի մասով խաղաղությունը։ Պատերազմները շատ դեպքում ինչու չեն սկսում, որովհետև հետևանքները սկսողի համար կարող են լինել ծանր։ Հիմա կայուն խաղաղության համար որևիցե գործոն այս պրոցեսում չեմ տեսնում»,- ասաց նա։

Ռոբերտ Քոչարյանը հայտարարեց՝ այս վարչախմբին, այո, մի թուղթ է պետք թմբկահարելու համար, որ  խաղաղություն են բերել և կապ չունի՝ ինչ խաղաղություն, կարևորը բառը  լինի՝ առանց բովանդակության։

Ըստ նրա` այսօր հանրության զգալի մասը միայն վերնագրերով է դատում, իսկ հաճախ վերնագրերը կապ չեն ունենում հոդվածի հետ, բայց կանխորոշում են մարդկանց տրամադրվածությունը։

«Փաշինյանը փայլուն է հասկանում՝ իր մասնագիտությունը դա է, նրա մասնագիտությունը դիվանագիտությունը չէ, խաղաղությունը չէ, պատերազմը չէ, որովհետև բոլորը ձախողվել է, բայց մուդլներ է ցույց տալիս, խաչմերուկ... դա խաչմերուկ չէ, դա տուպիկ է և վաճառում է մեր հանրությանը որպես խաչմերուկ»,- ասաց նա։

ՀՀ երկրորդ նախագահը նշեց, որ, ըստ էության, հնարավոր է, որ նման մի թուղթ լինի, բայց ոչ հարատև խաղաղության երաշխիքով. «Որովհետև չկա որևէ զսպող մեխանիզմ»։