Շիլաշփոթ չկա․ սեզոնից սեզոն, էականորեն այս թվերը կարող են տարբերվել․ Ավինյանը՝ Սուքիասյանին

2024-ին մեկ ուղևորության ինքնարժեքը ներկայացրել եք 213 դրամ, հիմա ասում եք՝ 313 դրամ. սա ի՞նչ շիլաշփոթ է։ Այս հարցադրմամբ դիմեց քաղաքապետ Տիգրան Ավինյանին «Մայր Հայաստան» խմբակցության ղեկավար Մանուկ Սուքիասյանը՝ անդրադառնալով տրանսպորտի ուղեվարձի թանկացմանը։

«Շիլաշփոթ որպես այդպիսին չկա և երբևէ չի եղել»,- Սուքիասյանի հետ փորձեց չհամաձայնել Ավինյանը։

Ըստ նրա` եղել է ստվեր և այդ ստվերի մասին բոլորս խոսել են, իսկ նոյեմբեր ամսից էլ այդ ստվերը սկսել է ճշգրտվել։ Ավինյանը նշեց, որ իր հնչեցրած թվերը  հիմնված են եղել նոյեմբեր ամսվա վերգետնյա տրանսպորտի ուղևորափոխադրման հիմքի վրա։ 

«Հիմա հունվարին ունենք այս թիվը, փետրվարին ունենալու ենք մեկ այլ թիվ, մարտին ունենալու ենք մեկ այլ թիվ: Սեզոնից սեզոն, էականորեն այս թվերը կարող են տարբերվել: Այո, հունվարին ուղևորափոխադրման քանակը նվազում է, ոչ միայն Հայաստանում: Բայց ուզում եմ վստահ լինեք, որ այս թվերի, այսպես ասած, շիլաշփոթ ասվածը, ուղղակի իրականությանն էլ չի համապատասխանում»,- ասաց Ավինյանը։

Նա վստահեցրեց, որ այսօր ունեն մի համակարգ, որի հիման վրա փաստացի ուղևորափոխադրման թիվն ենք տեսնում։

«Լավ, ենթադրենք նաև ձեր մատնանշած բոյկոտի հիմքով ինչ-որ մի մասը «Թելսելի» ապարատով չենք տեսնում կամ վալիդատորով չենք տեսնում, վաղը տեսնելու ենք այդ մարդաքանակ հաշվող սարքերով, կամերաներով ամեն ավտոբուսի մեջ դրված»,-ասաց Ավինյանը։