Նիկոլ Փաշինյանը դե ֆակտո հրապարակել է պոպուլիստական նախընտրական երկու «թեզ»․ վերլուծաբան

Նիկոլ Փաշինյանը դե ֆակտո հրապարակել է պոպուլիստական նախընտրական երկու «թեզ»: Մեկը, որ պատրաստվում է ներել տաքսու վարորդների չվճարած տուգանքները, մյուս՝ պետությունը պատրաստվում է թոշակառուների համար նախաձեռնել, այսպես ասած, «սոցիալական բիզնեսներ»: Այս մասին գրել է վերլուծաբան Հակոբ Բադալյանը։

«Ակնհայտ է, որ այդպիսով թիրախում տաքսու վարորդների եւ նրանց ընտանիքների, եւ թոշակառուների փայներն են:

Երկուսը չդնենք «մեկում»: Եթե լինեն թոշակառուներին սոցիալական բարեկեցության միտված իրապես արդյունավետ նախաձեռնություններ, այլ ոչ թե այնպիսիք, որ թոշակառուից կպահանջի օրինակ տեխնոլոգիական հմտություններ եւ գրեթե 500 հազար թոշակառուներից միայն 500-ը կկարողանա օգտվել որեւէ այդպիսի ճարից, ապա դա իհարկե կլինի ողջունելի:

Այսինքն, բարձրաձայնելը դեռ շատ քիչ է, պետք է դատել առաջարկի բովանդակությամբ: Ի վերջո, «տրանսպորտի ռեֆորմն» էլ ա բարձրաձայնվում, բայց այն աղերս չունի ռեֆորմի հետ:

Ինչ վերաբերում է տաքսու վարորդների չվճարած տուգանքների պարտքը ջրելուն, ապա այդպիսի նախաձեռնությունները իրենց խորքում ըստ էության խթանում են հասարակական հարաբերություններում բարոյական նորմերի քայքայում:

Ընդ որում, սրա մասին ասել եմ նաեւ հենց 2018-ից հետո կիրառված նույն մոտեցման առնչությամբ:

Այլ հարց է, եթե օրինակ կառաջարկվի պարտքի մարման այսպես ասած առավել փափուկ մի մեխանիզմ: Բայց, երբ պետությունը ստանձնում է իր իսկ սահմանած տուգանքների, վարչական տույժերի չվճարման հետեւանքով պարտքը «ջրելու» հանձնառություն, ապա՝ հենց իշխանության «լեզվով» ասած, դա ապապետություն է»,-գրել է նա: