Հայկ սարգսյանի նախաձեռնությունը կարծես թե խոստանում է դառնալ ներիշխանական «բաժանարար գծերի» լակմուսի հետաքրքիր «թուղթ»․ Հակոբ Բադալյան

ՔՊ պատգամավոր Հայկ Սարգսյանը օրենսդրական նախաձեռնություն է ներկայացրել, որով առաջարկում է հարկել շահումով խաղերի ոլորտում գործունեությունը՝ 10 տոկոս: Այս մասին գրել է վերլուծաբան Հակոբ Բադալյանը։

«Իհարկե, նախաձեռնության մոտիվների վերաբերյալ կարող են լինել տարբեր կարծիքներ, բայց իմ սուբյեկտիվ գնահատմամբ՝ սա նախաձեռնություն է, որ պետք է լիներ վաղուց: Հայաստանում շահումով խաղերի տիրույթում շրջանառվում են տրիլիոններ, որոնք ըստ էության չեն ենթարկվում համարժեք հարկման:

Եվ դա այն դեպքում, երբ բարձրանում է հարկային բեռը եւ ընդհանրապես ֆիսկալ բեռը շարքային քաղաքացիների համար:

Ավելին, 2018-ից հետո «հեղափոխական» մեծամասնությունը ընդունեց օրենքներ, որոնցով սահմանափակվեց շահումով խաղերի գովազդը լրատվամիջոցներում, ինչը էապես հարվածեց լրատվամիջոցների ֆինանսական կարողություններին, թեեւ որեւէ կերպ ազդեցություն չունեցավ վիճակախաղամոլության նվազմման վրա, ինչի նպատակն իբրեւ թե հետապնդում էր գովազդի արգելքը:

Ընդ որում, այս մասին գրել եմ նաև այդ ժամանակ, որ կայացվում է որոշում, որից տուժելու են միայն ու միայն լրատվամիջոցները, չի լինելու ոչ մի այլ հանրային օգտակարություն:

Իդեալում իհարկե շատ լավ կլիներ արգելել այդ գործունեությունը եւ խաղադրույքները ընդհանրապես: Սակայն, իմ սուբյեկտիվ գնահատմամբ Հայաստանի տնտեսությունը այսօր պատրաստ չէ այդպիսի վիրահատական միջամտության եւ մեծ հարց է, դա կբերի սոցիալական էֆեկտի, թե վնասի:

Եվ, քանի որ գործունեությունը կա՝ իր ահռելի շրջանառությամբ, գոնե նվազագույն հանրօգուտ արդյունքի համար պետք է պարզապես ապահովել գերշահույթների համարժեք հարկում: Իմ անձնական կարծիքով, այդ ոլորտի տնտեսվարողների շրջանառության համար 10 տոկոսը նույնիսկ քիչ է:

Իսկ նախաձեռնությունը կարծես թե խոստանում է դառնալ ներիշխանական «բաժանարար գծերի» լակմուսի հետաքրքիր «թուղթ», ինչի մասին վկայում էր տնտեսական հարցերի հանձնաժողովում քննարկումը:

Ի վերջո, մամուլի հրապարակումներից վաղուց նորություն չէ այդ ընկերությունների եւ իշխանության տարբեր թեւերի սերտ կապերի հանգամանքը»,-գրել է նա: