Մարտը փորձության շրջան է լինելու

Այս տարին աչքի ընկավ աննախադեպ եղանակային վայրիվերումներով: Նախ գրանցվեց բավականին տաք փետրվար և մարտ, այնուհետև եղանակը կրկին փոփոխվելու է: Վաղվանից կանխատեսվում է ջերմաստիճանի կտրուկ նվազում՝ 8-10 աստիճանով:

Արդյոք նման պայմաններում, հատկապես Արարատյան դաշտում, որտեղ ծիրանենիները ծաղկել են, կա ցրտահարության վտանգ: ՀՀ արտակարգ իրավիճակների նախարարության Հիդրոմետ ծառայության օդերևութաբանության կենտրոնի պետի տեղակալ՝ Գագիկ Սուրենյանը նշեց, որ մարտի 16-ին պարզ կլինի: Հիդրոօդերևութաբանները զգուշանում են նախապես որևէ կանխատեսում անելուց, թեև սովորաբար կանխատեսում են առաջիկա հինգ օրերի համար միայն:

Նշենք, որ այս տարի ծիրանենիները աննախադեպ շուտ ծաղկեցին և մինչև մարտի վերջ կանխատեսվող ոչ տաք ջերմաստիճանը չի բացառվում, որ ունենա բացասական հետևանքներ, հնարավոր է, որ ոչ:

Սովորաբար ցրտահարությունների սպասում են մինչև ապրիլի 20-ը, որից հետո արդեն նվազում է ցրտահարության վտանգը:

Հողօգտագործողների համար նման եղանակային պայմանները չեն հուսադրում: Ցրտահարության վտանգի առջև են և ծիրանենիները, նշենիները, նաև խաղողի վազերը:

Հիշեցնենք, որ անցած տարի խաղողի մթերման դիմաց չվճարելուց հետո խաղողագործների զգալի մասը վազերը հողով չեն ծածկել, որն իրականացնում են Արարատյան դաշտում, որպեսզի վազերը չցրտահարվեն: Մարտյան ոչ բարենապատս եղանակային պայմանները չի բացառվում, որ բաց վազերը ավելի շատ և ավելի շուտ վնասեն, քան եթե ծածկված լիներ:

Այնպես, որ վաղ ծաղկող ծառապտուղների առումով մարտը փորձության շրջան է լինելու: