Արմեն Գալջյանի համար տրանսպորտի թանկացած ուղեվարձը վճարողները քաղաքակիրթ են, իսկ բոյկոտողնե՞րը. թամամ խոսքը էշին կասեն

Երևանի ավագանու «Քաղաքացիական պայմանագիր» խմբակցության ղեկավար, 27-ամյակը դեռ չբոլորած Արմեն Գալջյանը որոշել է դառնալ «ծյունինգ» եղած Հայկ Մարությանը: 

Եթե ժամանակին Մարությանն ասում էր, թե Հայաստանում կան սպիտակ ուժեր և սև ուժեր` այդպիսով թիրախ դարձնելով այն ժամանակվա իշխանության ընդդիմախոսներին, ապա հիմա էլ Գալջյանն է մոտավորապես այդպիսի բաժանում անում: 

Արդեն երրորդ օրը շարունակվող բոյկոտի ֆոնին, նա ֆեյսբուքյան իր էջում մոնտաժված տեսանյութ է հրապարակել, որտեղ երևում են քաղաքացիներ, որոնք վճարում են տրանսպորտի ուղեվարձը: Այդ տեսանյութին կից նա գրել է` «Քաղաքակիրթ ժողովուրդ»:

Նախ, հայտնի չէ, թե երբ են նկարահանված այս տեսանյութի տարբեր հատվածները. սա մեկ: Երկրորդ` հունվարի 31-ին գնված 100 դրամանոց տոմսերը դեռևս ուժի մեջ են մինչև վաղը, իրական պատկերը դրանից հետո կերևա: Երրորդը` եթե ՔՊ-ականն այսկերպ փորձում է ցույց տալ, թե մարդիկ հաշտ են թանկացման որոշմանը, ապա ինչո՞ւ դա չի ցուցադրում ուղիղ եթերում, ինչպես իր սրտի իշխանության տարբեր ներկայացուցիչներին է բնորոշ: Ակնհայտ է, որ առնվազն այլ` իրեն հիասթափոցնող պատկեր կստանար: 

Եվ վերջում` ամենակարևորը. եթե քաղաքակիրթ են վճարող մարդիկ, ապա չվճարողները, կամ որ նույն է` թացը չորից տարբերողները, իրենց իրավունքներն իմացողները, այս իշխանությանը չվստահողները, ամեն քայլափոխին թանկացումների հետ չհաշտվողները և վերջապես աղքատ մարդիկ, որ պարզապես ունակ չեն վճարելու թանկացած տրանսպորտի, աղբահանության, գույքահարկի, սննդի, և այլնի համար, ոչ քաղաքակի՞րթ են: 

Ոչ, հազար անգամ ոչ: Այդ Արմեն Գալջյանի պատկերացումներն են տարբեր իրական քաղաքակրթության մասին պատկերացումներից: Չէ՞ որ Գալջյանի ողջ կենսագրությունը կապվում է ՔՊ-ի անվան հետ, որտեղ առաջնորդի մակարդակով տեսախցիկների առաջ հետույք են քորում, անշնորհքաբար ուտում են, ցուցադրում են իրենց տանը թափված կոշիկները... մնացածը թվարկման ենթակա էլ չէ:

Ինչևէ, ՔՊ-ական այս երիտասարդի գրառման ներքո քաղաքացիներն արդեն նկատել են, որ Գալջյանը ժողովրդին մասերի է բաժանում.

«Լավ էլ բաժանում եք ժողովրդին մասերի, քաղաքակիրթ , ոչ քաղաքակիրթ։ Էդ մի ստվար քաղաքակիրթ մասսան էլ կընտրի ձեզ մյուս անգամ, այ դրա մասին մտածեք, որ ձեր ձեռքով ձեր փոսն եք փորում։ «քաղաքակիրթ իշխանություն»»:

Ի պատասխան` Գալջյանն արդարացել է, թե` «Ես ոչ մեկի չեմ բաժանել, ժողովրդին որպես հավաքական կերպար անվանել եմ քաղաքակիրթ, եթե Ձեզ պետք է դա այլ կերպ ներկայացնել խնդրեմ, չեմ դիմադրի»:

Ժողովրդական խոսքով պատասխանենք այս` բանակում չծառայած, ՔՊ-ից բացի որևէ «այլ տեղ» չաշխատած պարոնին` «թամամ խոսքը էշին կասեն»: Նա իր «ոչ թամամ» խոսքն արդեն ասել է մարդկանց:

NEWSPRESS.am