2020-ին ու 2021-ին օրերով հաց չեմ կերել՝ ի հիշատակ մեր նահատակների․ կներեք ինտիմ մանրամասների համար. Փաշինյան

Ուզում եմ բոլորիս համար գաղտնիք բացել․ աշխարհի բոլոր առաջնորդները, բոլորն անխտիր, սնվում են։ Ես ձեզ դա ասում եմ որպես այդ առաջնորդներից գոնե կեսի հետ շփված մարդ։ Այս մասին մամուլի ասուլիսի ժամանակ հայտարարեց Նիկոլ Փաշինյանը՝ անդրադառնալով դիտարկմանը, թե Փաշինյանը խոհանոցից դուրս չի գալիս։

«Հիմա կարող եք հարցնել, թե ինչ կարիք կա դա ցուցադրելու․ դա ընտրության ու ճաշակի հարց է, գուցե դա ցույց տալու նպատակներից մեկն այն է, որ հիբրիդային պատերազմի միջոցով փորձ է արվում հանրությանը տոկի տալ՝ դա այնքան էլ այդպես չէ»,- ասաց նա։

Փաշինյանը հայտարարեց, թե եղել է, որ ինքն օրերով ու շաբաթով հաց չի կերել։

«Վստահ չեմ, որ սենց ինտիմ մանրամասներ ասելով ճիշտ եմ անում, թե չէ, բայց օրինակ՝ 2020 թվականի նոյեմբերին եղել է մի շաբաթ, որ, բացի ջրից, ուրիշ ոչինչ չեմ ընդունել, 2021 թվականի նոյեմբերին էլ եղել նման բան, որ ես, ի հիշատակ մեր նահատակների, մեկ շաբաթ, բացի ջրից, որևէ ուրիշ բան չեմ ընդունել»,-  ասաց նա՝ ներողություն խնդրելով ինտիմ մանրամասներ հրապարակելու համար։