Ձկնարտադրության ոլորտում խոշորները ուտում են մանրերին

Ձկնարտադրության ոլորտը շարունակական անկում է գրանցում: Նախորդ տարվանից արդեն փակվել է 90-ից ավել ձկնարտադրական տնտեսություն: Newspress.am-ի հետ զրույցում ասաց «Հայ ձկնարտադրողների եւ ձկնարտահանողների միություն» ՀԿ նախագահ Արթուր Աթոյանը` հավելելով, որ ավելի քան 3 տասնյակ տնտեսություններ էլ կանգնած են փակման եզրին: Կառավարությունն էլ քայլեր կարծես չի ձեռնարկում, հակառակը, հիմա էլ ջուրն են փորձում թանկացնել:

Արթուր Աթոյանի դիտարկմամբ` ջրի թանկացումը էլ ավելի կխորացնի ոլորտի ճգնաժամը, 2015 թվականին արտահանման ծավալները խիստ նվազել են: Այն ընկերությունները, որոնք մեկ շաբաթում արտահանում էին 20 տոննա ձկնամթերք, հիմա չորս անգամ կրճատել են ծավալները։ Իսկ ինքնարժեքի բարձր լինելու պատճառով արտաքին շուկայում հայկական արտադրանքը զիջում է մրցակիցներին: ՀԿ նախագահի կարծիքով ` ոլորտը գնում է քայքայման և մենաշնորհացման. «Ձկնաբուծության ոլորտում սկսվել է սխալ ռազմավարության գործընթաց: Ամեն մեկն իրեն իրավունք է վերապահում չճշտված, սխալ տեղեկություններ հրապարակել ձկնաբուծության ոլորտի մասին, իբր թե 8 հազարից ավելի հեկտար հող չի ոռոգվում, քանի որ ջուրն օգտագործվում է ձկնարտադրողի կողմից, կամ էլ 30 համայնք ջրազրկվել է՝ ձկնարտադրողների օգտագործած ջրի հետևանքով: Սրանք իրականության հետ կապ չունեցող հայտարարություններ»,- մանրամասնեց նա:

Արթուր Աթոյանը նաև ընգծեց, որ տպավորություն է ստեղծվում, թե գյուղատնտեսության նախարարությունում կամ իրավիճակը լավ չեն հասկանամ, կամ էլ չեն ուզում տեսնել:

Հիշեցնենք, որ ձկնարտադրության ոլորտում խոշոր տնտեսավարողներից է Սամվել Ալեքսանյանը, Գագիկ Ծառուկյանը և Ջոնիկ Աբրահամյանը, գուցե հենց սրանով է պայմանավորված համապատասխան օղակների վերաբերմունքը ոլորտի նկատմամբ: