Ռուսաստանը Հայաստանին և Ադրբեջանին օգնություն է առաջարկում սահմանների սահմանազատման հարցերում. Օվերչուկ

Մոսկվան ողջունում է Բաքվի և Երևանի ձեռք բերած առաջընթացը սահմանների սահմանազատման և սահմանագծման հարցերում և պատրաստ է ցուցաբերել անհրաժեշտ օգնություն։

Այս մասին «Ինտերֆաքս»-ին ասել է ՌԴ փոխվարչապետ Ալեքսեյ Օվերչուկը՝ մեկնաբանելով փոխվարչապետների մակարդակով եռակողմ աշխատանքային խմբի աշխատանքը՝ Հարավային Կովկասում տրանսպորտային հաղորդակցությունների ապաշրջափակման նպատակով։

«Մենք միշտ ողջունել ենք նման շփումները և նման համատեղ աշխատանքը, քանի որ դա անկասկած կնպաստի տարածաշրջանում կայունությանը։ Մեր կողմից մենք միշտ առաջարկել ենք աջակցել այս գործընթացը։ Ռուսաստանն ունի համապատասխան քարտեզագրական նյութ, որը կարող է տրամադրվել կողմերի պահանջով»,- ասել է նա։

Նա հավելել է, որ ռուսական կողմը կարող է խորհրդատվական օգնություն ցուցաբերել, քանի որ նման աշխատանքի մեծ փորձ ունեն հարևանների, այդ թվում՝ Ադրբեջանի հետ:

Օվերչուկի խոսքով՝ Հայաստանի և Ադրբեջանի սահմանին շատ կառուցողական աշխատանք է տարվում:

Նա հիշեցրել է, որ Հայաստանի և Ադրբեջանի փոխվարչապետերը զբաղվում են սահմանային հարցերով, հանդիպել են եռակողմ հանձնաժողովի աշխատանքի շնորհիվ։

«Եվ ես գիտեմ, որ նրանց միջև լավ աշխատանքային կապ է հաստատվել, և սա արդեն շատ մեծ արդյունք է՝ հաշվի առնելով, որ այդ երկրների միջև դիվանագիտական ​​հարաբերություններ դեռ չկան, և խաղաղության պայմանագիր չի ստորագրվել»,- ընդգծել է ՌԴ փոխվարչապետը։

Խոսելով եռակողմ աշխատանքային խմբի աշխատանքի մասին` Օվերչուկը նշել է, որ ոչ ոք պաշտոնապես չի դադարեցրել այն։

«Մենք պարբերաբար շփվում ենք, բայց ոչ եռակողմ ձևաչափով», - պարզաբանել է նա։