Ես ճնշումների անունը չգիտեմ, բայց դատավորը կաշկանդվածություն ուներ․ չկա որևէ ապացույց, որով կարելի էր մեղավոր ճանաչել․ Ասլանյանը կբողոքարկի վճիռը

Ինձ կալանավորել են ընտրություններում հաղթելուց 10 օր հետո, երբ մենք ընդհանուր հայտարարի չեկանք։ Այս մասին դատական նիստից հետո լրագրողների հետ զրույցում ասաց Վանաձորի նախկին քաղաքապետ Մամիկոն Ասլանյանը։

Հիշեցնենք, որ դատարանի վճռով Ասլանյանը դատապարտվել է 4 տարի 4 ամիս ժամկետով ազատազրկման, որից հանվել է բանտում անցկացրած ժամանակը և մնացել է 1 տարի 9 ամիս։ Նա նաև 3 տարի զրկվել է պաշտոն զբաղեցնելուց։

Ասլանյանը նկատեց, որ վճիռը բողոքարկվելու է։

«Չենք կարող չբողոքարկել, որովհետև մենք, ըստ էության, մեծ հաշվով այսօրվա Հայաստանում առավելապաշտական ակնկալիքներ չունեինք։ Ուղղակի հաճախ նաև խղճահարություն ու նողկանք է առաջանում մարդու մոտ այս պրոցեսներին հետևելիս: Բնականաբար, քանի ներհայաստանյան դատական ատյանները չեն սպառվել, պիտի բողոքարկենք»,- ասաց Ասլանյանը:

Նա վստահեցնում է, որ ակնկալում են ամեն մի ինչ՝ ամենավատից մինչև ամենալավը: Որպես իրավաբան, Մամիկոն Ասլանյանը, ինչ-որ չափով հույս է ունեցել, որ դատարանի վրա ճնշումներ չեն լինի, բայց կարծես՝ կան։

«Ես այդ ճնշումների անունը չգիտեմ, ես չգիտեմ` դրա անունն ինչ է, բայց տեսնում եմ, որ դատավորը կաշկանդվածություն ուներ, նրա հուզական վիճակից էլ էր երևում, և դատական քննության որևէ փուլում որևէ ապացույց, որևէ մատնանշում, որևէ նույնիսկ ակնարկ չի եղել մեղավորության հետ կապված: Որևէ վկայություն, որևէ փաստաթղթային ինչ-որ բան չի եղել, որով կարելի էր մեղավոր ճանաչել»,- ասաց նա։