Այսօր ստացա իմ «մերկապարանոց պնդումների» վերաբերյալ դատախազության արձագանքը․ Քոչարյան

Խոսել էի ոստիկանության կողմից առանց տեսաձայնագրման անձնական խուզարկություն իրականացնելու և առանց ձերբակալված անձի լռելու իրավունքը նրան պարզաբանելու ինքնախոստովանական հայտարարություն վերցնելու անթույլատրելիության մասին:

 

Այսօր ստացա իմ «մերկապարանոց պնդումների» (ըստ Ավան և Նոր Նորք վարչական շրջանների դատախազության ավագ դատախազ Ն. Թոփուզյանի որակման) վերաբերյալ դատախազության արձագանքը:

Եվ այսպես, ներկայացնում եմ դատախազի թեզերը վերոգրյալ խնդրի առնչությամբ՝ առանց մեկնաբանությունների.

 

1) ձերբակալվածի իրավունքները չպարզաբանված լինելը պետք է ապացուցի ձերբակալվածը և ոչ թե վարույթ իրականացնողը

 

2) ձերբակալվածի իրավունքների ցանկը նրան ստորագրությամբ հանձնելը իրավունքների պարզաբանման փաստի ապացույց է,

«Ոստիկանության մասին» օրենքով նախատեված իրավունքների բանավոր պարզաբանման պարտականությունը (խոսքը գնում է 5-րդ հոդվածի 4-րդ մասի մասին) պարտադիր չէ, որովհետև նախատեսված չէ քրեական դատավարության օրենսգրքով,

 

3) Քրեական դատավարության օրենսգիրքը «Ոստիկանության մասին» օրենքից ավելի բարձր իրավաբանական ուժ ունի,

 

4) Եթե ձերբակալվածը չի հայտարարում իր իրավունքների խախտման մասին, ապա պաշտպանն էլ ինչ՞ու է նման հայտարարություն անում (զարմանում է, թե որպես պաշտպան ես ինչ՞ի եմ հուզվել),

 

5) ապացույցը մասնակի անթույլատրելի չի կարող ճանաչվել, որովհետև քրեական դատավարության օրենսգրքով ապացույցը մասնակի անթույլատրելի ճանաչելու կարգ չկա,

 

6) ոստիկանությունը անձնական խուզարկություն կարող է կատարել առանց տեսաձայնագրման, որովհետև դատավարական օրենքով նման կարգ նախատեսված չէ, և որովհետև ոստիկանությունը քննչական գործողություն կատարելու իրավունք չունի (այդ դեպքում, չեմ հասկանում, 5000 դրամանոց ընթերականերին էլ ինչ՞ու են ծանրաբեռնում, սա էլ օրենքով նախատեսված չէ «ոստիկանական» անձնական խուզարկության համար)։ Փաստորեն, քննիչի մոտ անձնական խուզարկության ենթարկվելը «բախտավորություն է», գոնե կտեսաձայնագրվի,

 

7) թերևս ամենացնցողը. գոյություն ունի անձնական խուզարկության չորս տեսակ...

Հիմա նոր եմ հասկանում, թե ինչն է ինձ խանգարում փաստաբանությամբ անվրդով զբաղվելու համար. այս դատախազի դիպլոմի բացակայությունն իմ կյանքում, ես այ էդ նույն դիպլոմից եմ ուզում, ավելի ճիշտ՝ դիպլոմ տվողից եմ ուզում...