ԸՕ նախագծի մշակման աշխատանքային խումբն ի սկզբանե պետք է լիներ մասնակցային. Արթուր Սաքունց

Ի սկզբանե Ընտրական օրենսգրքի նախագծի մշակման գnործընթացում ընդգրկվել են խիստ սահմանափակ թվով մարդիկ, ընդ որում իշխանության ներկայացուցիչներ, նրանք, ովքեր ոչ միայն այդ փաստաթուղթը մշակողներն են, այլև դրա վերաբերյալ որոշում կայացնողները:

Այս մասին newspress.am-ի հետ զրույցում ասաց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը` անդրադառնալով ԸՕ հանրային քննարկումներին:

Նա իհարկե նկատում է, որ փաստաթուղթը Ազգային ժողովում քննարկման դրվելուց առաջ պետք է կառավարությունը հաստատեր, ինչը և արվեց, սակայն իրավապաշտպանը համոզված է, որ գործընթացի նկատմամբ վստահությունն ավելի մեծ կլիներ, եթե նախագիծը մշակող խմբի մեջ ներգրավված լինեին և ներքաղաքական բոլոր ուժերը, և քաղաքացիական կազմակերպության ներկայացուցիչները, ովքեր դիտորդական առաքելություն են իրականացրել և փորձ ունեն:

«Աշխատանքային քննարկումները կլինեին հենց այդ խմբում, իսկ այս պարագայում քննարկումներ են ծավալվում ինչ-որ պատրաստի փաստաթղթի շուրջ, որը ավելին` Վենետիկի հանձնաժողովի փորձաքննությանն է ներկայացվել»,- նկատում է իրավապաշտպանը:

Արթուր Սաքունցը հիշեցնում է, որ առիթ ունեցել են ներկայացնելու իրենց դիրքորոշումը: Դրանք առաջարկներ են, որոնք մասավորապես 3-ն են` ընտրական ցուցակները, տեսագրությունները և ընտրակարգի վերլուծությունների հիման վրա ստացված եզրակացությունները` որպես իրավական ապացույց կիրառելը, սակայն այս առաջարկներին չեն արձագանքել:

«Նախագծով ընտրական պրոցեսի նկատմամբ վերհսկողության հնարավորություններն են որոշակի սահմանափակվում: Տենդենցն այդ ուղղությամբ է գնում և դա մեզ համար իհարկե մտահոգիչ է: Պատրաստ են արդյոք առաջարկություններն ընդունելու կամ այս նախագծում փոփոխություն կատարելու համար. ցավոք սրտի ես քննարկումների ընթացքում այդպիսի տպավորություն չստացա…»,- նշեց Սաքունցը:

Նա օրինակ է բերում վստահված անձանց և լրագրողների սահմանափակությունը ընտրատեղամասերում: Ըստ որի 8 հոգուց ավելի անձիք չպետք է լինեն տեղամասում: Արթուր Սաքունցը նկատում է, որ դա իրատեսական չէ ու երբ այդ մասին մատնանշում ենք, պատասխանում են, թե առաջարկեք այլ տարբերակ, այն դեպքում, երբ այդ տարբերակն ավելի շուտ առաջարկել ու քննարկել:

«Չպետք է ինչ-որ կետ նախագծի մեջ ամրագրեին ու հետո մտածեն, թե ոնց անեն, որ այն փոփոխեն: Նախագծի մշակման աշխատանքային խումբը ի սկզբանե պետք է լիներ մասնակցային` վստահությունն այդտեղից է գալիս»,-եզրափակեց Սաքունցը: