Հիմա ձեր հերթն է... Ջո Բայդենը Սպիտակ տանը հանդես է եկել հրաժեշտի ելույթով

ԱՄՆ նախագահ Ջո Բայդենը Սպիտակ տան գրասենյակից հրաժեշտի ելույթով ամփոփել է ոչ միայն նախագահի պաշտոնում իր չորս տարիները, այլև կեսդարյա քաղաքական գործունեությունը։ Նրա հայտարարությունները մեջբերում է Ամերիկայի ձայնը։

Ժողովրդին ուղղված իր հրաժեշտի ուղերձում ԱՄՆ նախագահը բարձր է գնահատել ժողովրդավարական ինստիտուտները, որոնք կառավարում են Միացյալ Նահանգները։

«Այս ամենի կենտրոնում 50 տարի մնալուց հետո ես գիտեմ, որ հավատալ Ամերիկայի գաղափարին նշանակում է հարգել այն ինստիտուտները, որոնք կառավարում են ազատ հասարակությունը՝ նախագահությունը, Կոնգրեսը, դատարանները, ազատ և անկախ մամուլը», - ասել է Բայդենը։

Բայդենն Ամերիկան ​​և ամերիկացիներին համեմատել է Նյու Յորքի Ազատության արձանի հետ։

«Ես շատ էի մտածում այն ​​մասին, թե ով ենք մենք, և թե ովքեր պետք է լինենք», - ասել է Բայդենը:

Անդրադառնալով իր ժառանգությանը և իր վարչակազմի ձեռքբերումներին՝ Ջո Բայդենը հույս է հայտնել, որ դրանք կդիմանան տարիներ շարունակ: 

Նա թվարկել է իր նախագահության որոշ ձեռքբերումներ, ներառյալ տարեցների համար դեղատոմսով դեղերի գների իջեցումը, զենքի անվտանգության մասին օրենքների ընդունումը և վետերանների խնամքը: Բայդենը նաև բարձր է գնահատել իր ձեռքբերումները արտաքին քաղաքականության մեջ և նշել, թե ինչպես է նա ուժեղացրել ՆԱՏՕ-ն:

Իր հրաժեշտի ելույթի ժամանակ Բայդենն ասել է, որ ԱՄՆ Սահմանադրությունը պետք է փոփոխվի, որպեսզի երաշխավորվի, որ ոչ մի նախագահ չի կարող խուսափել պատասխանատվությունից՝ պաշտոնավարման ընթացքում կատարված հանցագործությունների համար: 

Բայդենն ավարտել է իր հրաժեշտի խոսքը լավատեսական նոտայով՝ ամերիկացիներին ասելով, որ ինքը դեռ հավատում է այն գաղափարին, որը պաշտպանում է այս երկիրը:

«Ես դիմում եմ ամերիկյան ժողովրդին: 50 տարվա պետական ​​ծառայությունից հետո ես ձեզ իմ խոսքն եմ ուղղում: Ես դեռ հավատում եմ այն ​​գաղափարին, որը պաշտպանում է այս երկիրը: Երկիր, որտեղ մեր ինստիտուտների ուժը և մեր ժողովրդի բնավորությունը կարևոր են և պետք է պահպանվեն», - ասել է նա:

«Հիմա ձեր հերթն է տեր կանգնելու…»,- եզրափակել է Բայդենը: