Կաթնարտադրությունը նվազում է, պանրագործությունը` ևս. Արմեն Գիգոյան

Եթե Հայաստանից պանիր է արտահանվում, ապա այս կամ այն կերպ Պանրագործների միությունը տեղյակ է լինում: Պանրագործների միության տվյալներով 2016թ-ին Հայաստանից Ռուսաստանի Դաշնություն արտահանվել է 3 ֆուռ` մոտ 40 տոննա պանիր: Այս մասին newspress.am-ին ասաց Պանրագործների միության նախագահ Արմեն Գիգոյանը:

Ըստ նրա, Ռոսսելխոզնադզորի հունվարի 20-ի ժամանակավոր արգելքից հետո, որոշ ժամանակ պանիր արտահանողների մոտ սպասողական վիճակ էր, որից հետո քիչ քանակով, սակայն արտահանումը շարունակվում է:

Նշենք, որ հունվարի 20-ից ժամանակավոր արգելք էր Ռոսսելխոզնադզորը մտցրել Հայաստանից Ռուսաստան դաբաղով հեշտորեն հիվանդացող կենդանիների (այդ թվում` խոզ, կով, գոմեշ, ոչխար և քարայծ) մսի ու այդ կենդանիներից ստացվող գենետիկ նյութի ներմուծման համար:

Իսկ այն, որ Սննդի անվտանգության պետական ծառայության տվյալներով, 2016թ-ի հունվարի 20-ից մինչև փետրվարի 4-ը Հայաստանի Հանրապետությունից Ռուսաստանի Դաշնություն է արտահանվել 408 տոննա 75 կգ պանիր, Արմեն Գիգոյանն այնքան էլ չի հավատում, որովհետև ավանդականորեն ձմռան շրջանում միշտ էլ պանիր քիչ է արտահանվել: Կաթնարտարդությունը նվազում է, պանրագործությունը` ևս: Արտահանումը նվազում է: Պանրի արտահանման պիկը, ըստ նրա, լինում է աշնանը:

Նշենք, որ Հայաստանում տարեկան սպառվում է մոտ 20 հազ. տոննա պանիր, իսկ արտահանման ծավալները կազմում են 1500 տոննա: