Ընտրությունները քաղաքական մակարդակից դարձյալ իջնելու են «թաղային» մակարդակի

Չկա նման բան. հենց հեղինակությունների անվան դիմաց է դրվելու նշանը և հենց այդ մարդիկ իրենց առջև դրված ձայն բերելու պլանը պետք է կատարեն:

Այս մասին newspress.am-ի հետ զրույցում ասաց ԱԺ պատգամավոր, «Լուսավոր Հայաստան» կուսակցության նախագահ Էդմոն Մարուքյանը, անդրադառնալով ՀՀ արդարադատության նախարար Արփինե Հովհաննիսյանի այն հայտարարությանը, թե նոր ընտրական օրենսգիրքը հնարավորություն չի տա «հեղինակություններին» խորհրդարան մտնել:

Պատգամավորի դիտարկմամբ՝ մրցակցության մեջ մեծամասնական ընտրաշավ է իրականցվելու:

«Տարածքային ցուցակներով առաջադրվելու են տասնյակ մարդիկ, ովքեր որ մեծամասնական ընտրարշավ են իրականացնելու: Դա բերելու է նրան, որ քաղաքական ընտրություն չի լինելու, այսինքն մրցակցությունը չի լինելու բրենդների միջև՝ ՀՀԿ-ի ու մյուս բրենդների միջև և քաղաքական մակարդակն իջեցվելու է, որպեսզի թաղային մակարդակում կարողանան հաղթել ընդդիմությանը, ինչը որ միշտ իրենց հաջողվել է»,- նկատեց Մարուքյանը:

Նրա որակմամբ՝ սա անընդունելի տարբերակ է և եթե այն մնա ուժի մեջ, ապա ընտրությունները կեղծելու իմաստ չի լինի, քանի որ այս մոդելով կարող են ուղղակի ձայներ հավաքել և այստեղ նույնիսկ ցուցակների հրապարակումը որևէ բան փոխել չի կարող:

«Իշխանությունը մշակել է մի մոդել, որին միայն իրենք են պատրաստ և դրա համար կարող են ընտրական տեղամասերում խախտում էլ չանել, էլեկտրոնային համակարգ էլ դնել, մատնահետք էլ վերցնել, ինչ ասես, քանի որ դա էական չի արդեն: Դա արդեն ամենաանընդունելի տարբերական է, քանի որ մեծամասնական 41 տեղերը ավելին են լինելու, քան այսօրվա մեծամասնական տեղերն են: Այսինքն հաջորդ խորհրդարանում 41-ի փոխարեն կլինի 51 և ավելի տեղ: Այդ մարդիկ նաև ձայն են բերելու համամասնական տեղերի համար՝ ինչը միշտ արվել է»,-ասաց պատգամավորը: