Աննա Հակոբյանը Լևոն Զուրաբյանի հարցազրույցը տգիտություն է անվանել

Նիկոլ Փաշինյանի կինը՝ Աննա Հակոբյանը որոշել է կրթել ու տգիտության ճիրաններից փրկել ՀԱԿ համակարգող Լևոն Զուրաբյանին։ 

Ֆեյսբուքյան իր էջում նա հրապարակել է Զուրաբյանի՝ «Ազատություն» ՌԿ-ին տված հարցազրույցից մի հատված ու գրել.

«Ալիևը զգացել է արյան հոտը: Նա հասկացել է, որ բացվել է մի պատուհան, որում ինքը կարող է օգտվել էսօրվա առավելություններից, որ Ադրբեջանն ունի և՛ որպես ռազմականապես բավականին ուժեղ պետություն, և՛ տնտեսապես բավականին ուժեղ պետություն, և՛ մի պետություն, որի հետ ստիպված են հաշվի նստել անգամ գեր տերությունները: Ինքը սա զգացել է, և սա ըստ էության հայտարարություն է նրա մասին, որ Ադրբեջանը շատ շուտով սկսելու է ռազմական գործողություններ Հայաստանի դեմ…. Էն, ինչ որ հիմա պլանավորում է Ալիևը, արդեն սահմանային վեճերի ինչ-որ լուծման հարցեր չեն, դա լինելու է բնակավայրերի գրավումը»։

Կրթվելը նորաձև է արշավի նպատակը այս և այսօրինակ գիգանտ վերլուծություններից մեզ անվերադարձ ազատելն է։

Տգիտության դեմ ագրեսիվ արշավը կօգնի նաև ամեն անգամ նման իրավիճակներում լռեցնել տգիտության անօգուտ աղմուկ-աղաղակը՝ որի հիմքում պարզ մարդկային վախն է։

Վախը նորմալ է, բայց տգետ պետք է լինել այսքան անթաքույց այն կառավարել չկարողանալու համար։ Արդյունքում, մտքի միակ արգասիքը շարունակում է մնալ Հյուսիսից փրկություն աղերսելը։

Կրթվելը նորաձև է արշավը այս մտքի հեղինակին և տգիտության բանակի բոլոր մյուս անխոնջ մարտիկներին հորդորում է այնքան կրթվել մինչև գլխում նոր միտք կառկայծի, գոնե թե՝ փրկվելու և մազապուրծ լինելու նոր տեսլական»։